ABŞ Prezidenti Donald Tramp əksər ölkələr üçün gömrük rüsumlarına "90 günlük fasilə" elan edib və eyni zamanda Çinə qarşı tarifləri artırıb. Bu qərar fonunda ABŞ fond bazarında kəskin artım qeydə alınıb.
Valyuta.Az göstəricilərdən "S&P 500" indeksi 6 faizdən çox, texnologiya şirkətlərinin üstünlük təşkil etdiyi "Nasdaq Composite" isə 8 faiz bahalaşıb. "Dow Jones" sənaye indeksi 5 faizdən çox, təxminən 2000 bənd artıb. Qeyd edək ki, ticarət sessiyasının əvvəlində hər üç əsas indeks mənfi zonada idi.
“90 günlük fasilə və bu müddət ərzində dərhal qüvvəyə minən 10 faizlik, xeyli aşağı salınmış qarşılıqlı tarifləri təsdiqlədim,” – deyə Tramp "Truth Social" platformasında paylaşım edib. O, həmçinin ABŞ-ın Çinə qarşı tariflərini 125 faizə qaldırdığını bildirib.
Bu arada, ABŞ-ın Çindən idxal olunan mallara 104 faiz rüsum tətbiq etməsi fonunda Pekin cavab tədbiri görüb. Gecikmiş reaksiya bazarlarda Çin tərəfinin təmkin nümayiş etdirəcəyi ilə bağlı ümid doğursa da, Çinin 84 faizlik qarşılıq rüsumları cümə axşamından qüvvəyə minəcək.
Bu addım, dünyanın iki ən böyük ticarət dövləti arasında artmaqda olan gərginliyi daha da dərinləşdirib və qlobal iqtisadiyyat üçün mümkün mənfi nəticələrlə bağlı narahatlıqları artırıb.
Trampın ötən həftə elan etdiyi qarşılıqlı tarif siyasəti Vyetnam, Yaponiya, Hindistan və digər ölkələrə qarşı ciddi tarif artımlarını nəzərdə tuturdu. Bu qərarlar çərşənbə axşamı Wall Streetdə yeni dalğalanmalara səbəb olub və "S&P 500" indeksini ayı bazarına bir qədər də yaxınlaşdırıb.
Tramp çərşənbə günü səhər saatlarında sosial şəbəkədə bazarların dəyişkən vəziyyəti ilə bağlı fikir bildirərək, “Almaq üçün əla vaxtdır!!!” deyə yazıb. O, həmçinin əlavə edib: “Səbir edin! Hər şey yaxşı olacaq. ABŞ əvvəldən də böyük və güclü olacaq!”
Bu arada, Federal Ehtiyat Sisteminin mart iclasının protokolları Trampın tarif siyasətinin yaratdığı stagflyasiya riskləri barədə siyasətçilərin narahatlığını üzə çıxara bilər. Protokolların bu gün açıqlanması, cümə axşamı dərc ediləcək İstehlak Qiymətləri İndeksindən (CPI) əvvəl inflyasiyanın istiqaməti barədə ilkin siqnal ola bilər.
Rəhim
