phrase_var_article.

94 ildən sonra II Ramzesin heykəlinin yarısı da tapılıb - Foto

reyting.az

07:43 29.04.2024

Smartbee
Şikayət et

Bir neçə gün əvvəl avropalı arxeoloqlar qrupu Misirdə qazıntılar zamanı aşkar olunmuş heykəl parçasının kimə məxsus olduğunu açıqlayıblar. Bu heykəldə təsvir edilmiş şəxsin Misirin əfsanələşmiş fironu və tarixi şəxsiyyət II Ramzes olduğu ortaya çıxıb.

Reyting.az-ın məlumatına görə, bu dəfə heykəlin yarısı tapılıb: böyük fironun üzü yaxşı qorunub saxlanılıb.

Tədqiqatçılar deyiblər ki, artıq bu tapıntı nəticəsində onlar qədim Misirin ən böyük və məşhur hökmdarlarından birinin - II Ramzesin heykəlini tam yığa biləcəklər.

Xarici mənbələrə istinad edən Rusiyanın "Elm" nəşri yazır ki, Kolorado Boulder Universitetinin tədqiqatçılarının rəhbərlik etdiyi arxeoloqlar qrupu Misirin Əl-Aşmuney şəhərindəki bir ərazidə II Ramzesin öz dövründə hazırlanan və itmiş hesab olunan heykəlinin parçasını uzun axtarışlardan sonra təsadüfən tapa biliblər. Tədqiqatçılar bildiriblər ki, II Ramzes tarixi şəxsiyyətdir, o təxminən eramızdan əvvəl 12 əsrdə Qədim Misiri idarə edib.

Xatırladaq ki, bu heykəlinin ilk hissəsini 1930-cu ildə almaniyalı alim, arxeoloq Günter Röder tapıb. İndi isə bu heykəli bütöv halda bərpa edib, nümayiş etdirmək mümkün olacaq. II Ramzesin heykəlinin yarısı Qahirədən 240 kilometr cənubda yerləşən qədim Hermopolis adlı şəhərin xarabalıqlarında tapılıb. Heykəlin bu hissəsi 3,8 metrdir. Tədqiqatçıların və alimlərin fikrincə, heykəlin tam uzunluğu təxminən 7 metr hündürlüyündədir.

Amerika-Misir ekspedisiyasının üzvləri qeyd ediblər ki, onlar II Ramzesin heykəlinin fraqmentini xüsusi olaraq bu yerdə axtarmayıblar. Heykəlin həmin ərazidə ola biləcəyi barədə onlarda məlumatlar olsa da, axtarışda məqsəd qədim mətnləri olan papirusu tapmaq olub.

Bu böyük tapıntı isə Britaniya Muzeyinin 1980-ci illərdə Hermopolisdə apardığı ilk qazıntının yeni və uğurlu davamı kimi də qiymətləndirilib.

İndi arxeoloqlar heykəlin iki hissəsinin də birləşdirilə biləcəyini düşünürlər. Bərpa prosesi başa çatdıqdan sonra isə onlar bütöv heykəli muzeyə göndərəcəklər.

Onu da qeyd edək ki, II Ramzes qədim Misirin ən məşhur fironlarından biri kimi tanınıb. O, tarixdə dövrünün ən uğurlu fironlarından biri hesab olunur. II Ramzes obraz kimi hətta bədii ədəbiyyatda, eləcə də kinoda bir sıra maraqlı personajların prototipinə çevrilib.

Tarixçilər qeyd edirlər ki, Misirin ən məşhur fironlarından biri II Ramzes qədim Misirin XIX firon nəslinin hökmdarı olaraq qanuni varis kimi taxta çıxıb. II Ramzesin varisi isə onun yolunu davam etdirən Merneptax olub.

Alimlərin təxminlərinə görə, II Ramzes 1304-1237-ci illərdə yaşayıb və 1237-ci ildə 67 yaşında ölüb. O, qədim Misirdə həm də ən qəddar və qurucu, islahatlar tərəfdarı kimi də tanınıb.

Oqtay QORÇU

Bütün xəbərləri reklamsız oxumaq üçün qeydiyyatdan keç və ya login ol. Günlük ölkədə baş verən xəbərləri bizdən izlə.

Seçilən

126