ABŞ Silahlı Qüvvələrinin Suriyada yerləşən bölmələrinin komandirləri Ağ Evin rəhbəri Donald Trampın Amerika qoşunlarını Ərəb Respublikası ərazisindən çıxarmaq niyyətindən xəbər veriblər.
Vətəninfo.az xəbər verir ki, bu barədə Suriya telekanalı mənbələrə istinadən məlumat yayıb.
Kanalın həmsöhbətləri iddia edirlər ki, Suriyanın keçid hökuməti ilə ABŞ-ın dəstəklədiyi “demokratik Suriyanın kürd qüvvələri” arasında razılaşma “ABŞ Prezidenti Donald Tramp administrasiyasının Suriyadakı qoşunlarını yaxın gələcəkdə Suriyadan çıxarmaq niyyəti barədə Suriyadakı ABŞ ordusundan siqnallar alındıqdan” sonra əldə edilib.
Eyni zamanda, telekanal göstərir ki, ABŞ Suriya Demokratik Qüvvələri (SDQ) komandiri Məzlum Abdini Dəməşqin yeni hakimiyyət orqanları ilə razılığa gəlməyə məcbur edib.
Bazar ertəsi Suriyanın keçid prezidenti Əhməd əş-Şara və Abdi kürd qüvvələrinin respublikanın keçid hökumətinin təhlükəsizlik qüvvələrinə qoşulması ilə bağlı saziş imzalayıblar.
Əl-Şara ofisi tərəfindən dərc edilən sənədə əsasən, Suriyanın şimal-şərqində SDQ tərəfindən ələ keçirilən ərazilərdə yerləşən hava limanı, qaz və neft yataqları daxil olmaqla, bütün mülki və hərbi obyektlər Dəməşq hökumətinin səlahiyyətinə keçəcək. Bu ilin sonuna qədər həyata keçirilməli olan razılaşma bütün Suriya ərazisində atəşkəs də nəzərdə tutur.
***
Suriyanın keçid prezidenti Əhməd əl-Şaranın ofisi kürd Suriya Demokratik Qüvvələri (SDQ) ilə Suriyanın yeni hakimiyyət orqanları arasında imzalanan sazişin təfərrüatlarını dərc edib.
Onun sözlərinə görə, razılaşmaya əsasən, Suriyanın şimal-şərqində yerləşən bütün mülki və hərbi obyektlər Dəməşqin yeni hakimiyyətinin rəhbərlik etdiyi hökumət sisteminə inteqrasiya olunacaq. Söhbət xüsusilə kürdlərin nəzarətində olan ərazilərdəki bütün keçid məntəqələrindən, eləcə də orada yerləşən hava limanından, qaz və neft yataqlarından gedir.
Bundan əlavə, Dəməşq və SDQ arasında saziş “bütün Suriyada atəşkəs”i nəzərdə tutur və kürd əhalisinə “konstitusiyada nəzərdə tutulan bütün hüquqlar, o cümlədən vətəndaşlıq hüququ” təmin edilir. Kürdlər isə öz növbəsində Suriyanın yeni hakimiyyət orqanlarına “Əsədin tərəfdarlarına və Suriyanın təhlükəsizliyini və birliyini təhdid edən digər amillərə qarşı mübarizədə” dəstək verəcəklərini vəd edirlər.
Müqavilə “bu ilin sonuna qədər” həyata keçirilməlidir.
Kürdlər Suriyanın 25%-nə, o cümlədən Rakka və Həsəkə əyalətlərinin əksəriyyətinə, həmçinin neft yataqlarının yerləşdiyi Deyr əz-Zorun şimal-şərqinə nəzarət edirlər. 2015-ci ildən bəri ABŞ kürdlərin nəzarətində olan ərazilərdə ən azı doqquz hərbi baza yaradıb.
