ABŞ prezidenti Donald Trampın qərarı ilə Ağ Evdə Birləşmiş Ştatların Məxfi Xidmətinin yeni direktorunun andiçmə mərasimi keçirilib.
Publika.az xəbər verir ki, bu vəzifəni sui-qəsd cəhdində Trampın köməyinə gələn ABŞ Məxfi Xidmətinin Mühafizə Qrupunun rəhbəri Şon Kurran icra edəcək.
Tramp mərasimdəki çıxışında Kurranın böyük işlər görəcəyini bildirib:
"O, ən mürəkkəb hadisələri belə təhlükəsizlik planları ilə idarə etməyə qadir olduğunu sübut etdi. Həmçinin Pensilvaniyadakı bir sui-qəsdçinin gülləsindən məni xilas etmək üçün həyatını riskə ataraq cəsarətini sübut etdi. Mən onun Məxfi Xidmətihəmişə olduğundan daha güclü edə biləcəyinə tam etibar edirəm”.
Xatırladaq ki, 13 iyul 2024-cü ildə Pensilvaniya ştatının Butler şəhərində mitinqdə tərəfdarları qarşısında çıxış edən Trampa silahla hücum edilib. Hadisə nəticəsində o, yüngül yaralanaraq qulağından xəsarət alıb. Atəş açan şəxs Məxfi Xidmət əməkdaşları tərəfindən zərərsizləşdirilib.
