Belə təəssürat yarana bilər ki, Donald Trampın bütün dünyada qıcıq doğuran rusiyapərəst açıqlama və addımları, Rusiyanın beynəlxalq izolyasiyadan çıxarılması, Putinə yağdırılan təriflər, Ukraynaya və şəxsən Prezident Volodimir Zelenskiyə qarşı hücumlar, işğala məruz qalan ölkəyə yardımın dayandırılması barədə bəyanatlar və s. hamısı bunun üçün idi. Yəni, bir anda Ukraynanı atəşkəs razılığına gətirib, “topu Rusiya meydanına atmaq” üçün...
Məlum olduğu kimi, dünən Səudiyyə Ərəbistanında ABŞ və Ukrayna arasında danışıqlar baş tutub və orada dərhal 30 günlük atəşkəs haqqında razılıq əldə olunub. ABŞ bəyan edib ki, Rusiya indi bu qərar əsasında sülhə hazır olduğunu nümayişetdirməlidir.
Hələlik Rusiya Federasiyasından bu təklifə rəsmi reaksiya verilməyib, lakin işğalçı və imperiyaçı siyasətin əsas ruporları olan “Z kanallarının” nümayəndələrinin və bəzi rəsmilərin bir sıra açıqlamaları Ciddədə əldə edilən razılaşmanın onların sıralarında çaşqınlıq yaratdığını göstərir.
Ümumilikdə əldə edilən razılaşmada 3 əsas məqamı önə çəkmək olar.
Birincisi, Ukraynanın 30 günlük atəşkəslə razılaşması. Əslində, Ciddədə saatlarla davam edən danışıqlara Ukrayna havada və dənizdə müvəqqəti atəşkəs təklifi ilə getmişdi. Lakin ABŞ quruda da hərbi əməliyyatların dayandırılmasını istəyib və Ukrayna bununla razılaşaraq, Tramp administrasiyasının və onun özünün Kiyevin guya sülh istəmədiyi barədə iddialarını “sıfırlayıb”. İndi ABŞ eyni addımın Rusiya tərəfindən atılmasını istəyəcək. Danışıqlardan sonra Ukrayna və ABŞ nümayəndə heyətləri birgə bəyanatda vurğuladılar ki, Rusiyanın bu atəşkəs təklifinə cavabı sülhə nail olmaq üçün açardır və qarşılıqlı razılıq əldə olunarsa, atəşkəs 30 günlük müddətdən sonra da uzadıla bilər.
