Bakı, 12 mart, AZƏRTAC
Azərbaycanda son dövrlərdə nikahdankənar doğulan uşaqların sayı 15 faizə çatıb. Bu göstərici cəmiyyəti narahat etməlidir. Həmçinin son illərdə anemiya və talassemiya ilə doğulan uşaqların sayında da artım müşahidə olunur. Xüsusilə anemiya ilə doğulan uşaqların sayında 65 faiz, talassemiya ilə doğulanlarda isə 86 faiz artım olduğu bildirilir. Bu artımın səbəbi qohum nikahlarının sağlamlıq üzərindəki mənfi təsirləridir.
AZƏRTAC xəbər verir ki, bu fikirləri Ailə, Qadın və Uşaq Problemləri üzrə Dövlət Komitəsinin Hüquqi təminat şöbəsinin müdiri Taliyə İbrahimova parlamentin Ailə, qadın və uşaq məsələləri komitəsinin “Konstitusiya və Suverenlik İli” çərçivəsində martın 12-də keçirilən “Ailə, qadın və uşaq hüquqları – konstitusion hüquqların əsas prioriteti kimi” mövzusunda ictimai dinləməsində çıxışı zamanı səsləndirib.
T.İbrahimova qohum nikahlarının demoqrafik inkişafda təbii artıma mənfi təsir etdiyini və bununla bağlı qanuna edilən dəyişikliklərin gələcəkdə daha bariz təsirlərinin olacağını vurğulayıb: “Bu məsələlərin diqqətə alınması, xüsusilə cəmiyyətin sağlamlıq məsələlərinə daha həssas yanaşması zərurətini ortaya qoyur. Nikahdankənar doğumların artması və qohum nikahların sağlamlıq üzərindəki mənfi təsirləri qarşısında atılacaq addımların əhəmiyyəti artmaqdadır”.
