Qazaxıstanın Aktau şəhərindəki Ş. Yessenov adına Universitetin birinci vitse-prezidenti Kaiyrbek Makulov, Beynəlxalq əlaqələr və turizm kafedrasının müdiri Elvira Janqozhayeva və “Azərbaycan Mərkəzi”nin direktoru İlkin Orucov Azərbaycan Turizm və Menecment Universitetində olublar.
Qazaxıstanın nüfuzlu ali təhsil müəssisəsinin məsul təmsilçilərini ATMU-da salamlamaqdan məmnunluğunu bildirən rektor İlham Mədətov bu ziyarətin səmərəli olacağına inandığını bildirib. Görüş çərçivəsində universitetlərarası akademik və elmi sahələrdə əlaqələrin genişləndirilməsi, tələbə-müəllim, təhsil və turizm sahəsində təcrübə mübadiləsinin əhəmiyyəti, tədqiqatyönümlü layihələrin, o cümlədən innovativ proqramların perspektivliliyi, elmi konfrans və seminarların təşkili, universitet-sənaye əməkdaşlığının möhkəmləndirilməsi məsələlərindən bəhs olunub.
Görüşün sonunda Azərbaycan Turizm və Menecment Universiteti və Qazaxıstanın Ş.Yessenov adına Universiteti arasında əməkdaşlıq müqaviləsi imzalanıb. Bu müqavilə iki ali təhsil müəssisəsinin fəaliyyət istiqamətində strateji tərəfdaşlığın gücləndirilməsinə və tədris prosesinin beynəlmiləşdirilməsinə zəmin yaradacaq.
ATMU-dan bildiriblər ki, görüşdə universitetin rektoru İlham Mədətov, Strateji inkişaf üzrə prorektor Araz Aslanlı, Elmi məsələlər üzrə prorektor İranə Əliyeva, Mehmanxana və restoran biznesi kafedrasının müdiri Novruz Quliyev və Beynəlxalq əlaqələr şöbəsinin müdiri Orxan Musa iştirak ediblər.
Z.HÜSEYNOVA
XQ
