“Barselona”nın unikal özəlliyi var – klub elə informasiya bombaları “buraxır” ki, aylarla müzakirə olunur. Çoxsaylı insaydlara inansaq, kataloniyalılar yayda iki əfsanənin – 37 yaşlı Lionel Messi ilə 33 yaşlı Neymarın dönüşünü hazırlayır. Guya Leo “Barsa” ilə lazımi şəkildə vidalaşmadan karyerasını bitirmək istəmir. Neymara gəlincə, onun “Santos”la müqaviləsinin müddəti yayda bitir, həmin vaxta qədər kataloniyalıları azad agent kimi müqavilə bağlamağın zəruriliyinə inandırmağa çalışacaq.
Əlbəttə, bütün bunları DÇ-2026-ya hazırlıq və top səviyyədə oyunlar vasitəsilə forma yığmaq prosesinin tərkib hissəsi kimi də baxmaq lazımdı. Ancaq bu duet indi “Barsa”nın baş məşqçisi Hans-Diter Flikə lazımdımı?
Girişdə də vurğuladığımız kimi, “Barselona”nın prezidenti Xuan Laporta güclü informasiya dalğası yaratmaqda ad çıxarıb. Və iki köhnənin (sözün bütün mənalarında…) dönüşü haqda olan yeni şayiələr tam onun üslubundadı. Əlbəttə, Messi və Neymar ilə müqaviləyə imza atmaq böyük hadisə olardı, klubun media və marketinq göstəricilərini yüksəldərdi.
Ancaq onu da anlayırıq ki, president idman hədəflərindən də əl çəkən deyil. Bu tarixçə bir qədər fərqlidi. Mümkün sövdələşmənin ziddinə olan ən böyük dəlil Flikin aşıladığı oyun üslubudu. Almaniyalı mütəxəssis güclü pressinqin və fiziki cəhətdən güclü futbolun fanatıdı. Onun “Bavariya”sı vaxtilə rəqiblərini hədsiz təzyiqlə “yıxırdı” – hücum, qaçmaq, topu almaq, həm də bütün bunları oyunboyu bacarmaq! Çoxdan artıq meydan boyunca qaçmağı tərgidən Messi ilə Neymarı belə oyun üslubunda təsəvvür etmək asan deyil. Əlbəttə, Leo ilə Ney yaradıclıq, ötürmələr, improvizasiya baxımından möhtəşəmdi. Amma belə sıx təqvim şəraitində oyunboyu çalışmaq onların şəxsi faciəsini şərtləndirə bilər.
Üstəlik baş məşqçi onları heyətə necə inteqrasiya etsin? Neymarla bağlı vəziyyət az-çox aydındı – hücumun sol cinahında Rafinyanın əvəzedicisi ola bilər. Ancaq deyilənə görə, “Barsa” yayda həmin mövqeni Dias, Leao və ya Uilyams ilə gücləndirmək fikrindədi. Onda Neymar nəyə lazımdı?
Messiyə gəlincə, onu bəlkə də hücumçuların arxasında oynatmaq olar. Ancaq Flikin sərəncamında həmin mövqe üçün o qədər oyunçu var ki – Olmo, Qavi, Fermin, Torre… Təbii, Leo lap 37 yaında da bu mövqedə yüksək səviyyə göstərməyə qadirdi. Ancaq yenə bəlli məqama qayıdaq – axı o pressinq əməliyyatlarında iştirak etməyəcək. Bir sözlə, iki əfsanənin eyni vaxtda dönüşü taktiki baxımdan tam mənasız qərar olardı.
Elə motivasiya ilə bağlı da şübhələr var. Axı bu iki ulduz yenilənmiş “Kamp Nou”da oynamaq arzusundan başqa hansı motivasiya tapacaq? Messi yaxınlarda həyata münasibətinin necə dəyişməsi haqda danışmışdı: indi o “hər yeni günə sevinir, gələcəklə bağlı az düşünür”. Belə görünür ki, Argentinanın zəfəri ilə bitən dünya çempionatından və Amerikaya köçəndən sonra Leo fərqli səviyyəyə adlayıb. Sakitcə məşq edir, meydanda özünü əziyyətə salmır – hətta belə iş rejimi də onun liqanın əsas ulduzu olmasına bəs edir. Çətin ki, Leoya Avropanın təzyiqi lazım olar. Neymar da iddia edir ki, onun üçün ən böyük sevinc futbol oynamaqdı. Baxmayaraq ki, bu sevinc “Santos”a yetərincə baha başa gəlir. Yeri gəlmişkən, vətənində möcüzələr törədir (künc zərbəsindən birbaşa qolunu gördüzmü?!), publikanı sevindirir. Təkcə elə Neymar adının səslənməsi bilet və atribut satışına ciddi təsir göstərib. Braziliyalı gümrah və xoşbəxt görünür. Deməli, hədsiz çox enerji xərcləməyin lazım gəldiyi La Liqaya dönüş, sərt Flikin rəhbərliyi altında meydanboyu qaçmaq ən azı şübhəli ideyadı.
Bu məsələ ilə bağlı emosional yönləri bir kənara atsaq, “Barsa”nın baş məşqçisi taktiki düşüncələrinə qətiyyən uyğun olmayan iki ulduzun dönüşünə heç cür sevinə bilməz. Bəli, Messi və Neymar cəlbedici sərlövhə yağışı, sosial şəbəkələrdə milyonlarla “bəyənmə” işarəsi, forma satışında rekordlar deməkdi. Ancaq bütün bunların meydanda yaşananlara dəxli yoxdu. Ən yaxşı illərində olduğu kimi meydanda xarüqələr yaratsalar, sevinməyə dəyər. Amma zədələr və ya sadəcə, yorğunluq Flikin bu gün təbliğ etdiyi oyun üslubuna xətər yetirsə, nə olacaq?
Çox güman, hələ bir müddət də bu mövzuda şayiələr, insaydlar, ehtimallar gündəmi zəbt edəcək, potensial dönüşlə bağlı xəbərlərin, açıqlamaların sayı artacaq. Bəlkə də həmin Messini gerçəkdən “Kamp Nou”ya qaytaracaqlar ki, “Barsa” karyerasına ən parlaq şəkildə son qoysun. Azarkeşlər də əsl nağılı haqq edib. Ancaq bu gün komandanın “sükanı arxasında” aydın sxemlərə və inadkar futbola əsaslanan Flik dayanıb. Belə oyun üslubunda köhnə kumirlər muzey eksponatları kimi görünür.
Hələ ki əsas sual açıq qalır: Messi ilə Neymar “Barsa”ya qayıdır, yoxsa biz növbəti piar gedişini müşahidə edirik? Düzünə qalsa, bütün bunlar güclənməklə bağlı rasional cəhddən daha çox Laportanın oyununa bənzəyir.
"Football-plus.az"
- Gecə Modu
- Ana səhifə
- Statistika
- Mənbələr
- Reytinq
- Hava
- Valyuta
