Yumurtanın yoxsa badamın daha çox protein ehtiva etdiyini bilirsinizmi? Protein, bədənin əsas quruluş daşlarından biri olub, əzələ quruluşu, toxuma bərpası və ümumi sağlamlıq üçün vacibdir. İnsanlar tez-tez protein mənbəyi kimi yumurta və badamı müqayisə edirlər.
E-saglam.az xəbər verir ki, yumurta tam zülal mənbəyidir və yüksək bioloji dəyərə malikdir. Bir yumurta orta hesabla 6 qram protein ehtiva edir. Yumurta ağında təxminən 3,6 qram, sarısında isə 2,7 qram protein mövcuddur. Bundan əlavə, yumurta B12, riboflavin, xolin, selen və D vitamini ilə zəngindir. Həmçinin göz sağlamlığı üçün vacib olan lutein və zeaksantin ehtiva edir.
Digər tərəfdən, badam da yaxşı protein mənbəyidir, 28 qramı (təxminən bir ovuc) 6 qram protein təmin edir. Bununla belə, badam tam protein deyil, çünki bəzi vacib amin turşularından, xüsusilə lizindən məhrumdur. Buna baxmayaraq, badam lif, sağlam yağlar və antioksidanlarla zəngindir, bu da onu qidalandırıcı bir seçimə çevirir. Onları paxlalılar və tam taxıllar kimi digər bitki əsaslı protein mənbələri ilə birləşdirmək amin turşularının balanslı qəbuluna kömək edə bilər.
Tədqiqatlar göstərir ki, yumurtanın tərkibindəki protein daha yüksək bioloji dəyərə malikdir, yəni orqanizm onu daha effektiv şəkildə mənimsəyə bilir. Həmçinin yumurta lösin kimi vacib amin turşuları ilə zəngindir və əzələ qurmağa kömək edir.
Arıqlamaq istəyənlər üçün isə həm yumurta, həm də badam yaxşı seçimdir. Yumurta aşağı kalorili və yüksək zülallıdır, badam isə sağlam yağlar və liflərlə zəngindir. Xüsusən bitki mənşəli qidalananlar üçün badamı digər bitki əsaslı zülallarla birləşdirmək qida balansını daha da yaxşılaşdıra bilər. Uzunmüddətli sağlamlıq üçün həm yumurta, həm də badam rasionun bir hissəsi ola bilər.
Tərcümə: Könül Oruc
