Pakistanın neft və qaz kəşfiyyatı və hasilatı sektorundakı yerli və beynəlxalq şirkətlər növbəti üç il ərzində ölkənin enerji sektoruna 5 milyard dollardan çox sərmayə qoymağa hazırlaşırlar.
Bu maraq neft siyasətinə edilən son düzəlişlərdən və daha yaxşı stimullar və daha əlverişli tənzimləyici baza təklif edən qaz siyasətinin tətbiqindən sonra yaranıb.
İslahatların yerli enerji istehsalını yüksəldəcəyi, həm yerli, həm də xarici investisiyalar cəlb edəcəyi gözlənilir. Rəsmi sənədlər göstərir ki, ötən il qaz qiymətlərinə edilən düzəlişlər “Sui Northern Gas Pipelines Limited” (SNGPL) və “Sui Southern Gas Company” (SSGC) kimi müəssisələrin maliyyə vəziyyətini yaxşılaşdırıb, sənaye və məişət istifadəçilərinin etibarlı qaz təchizatını təmin edib.
Yeni kəşf edilmiş ehtiyatlardan qazın ayrılması həm də təbii tükənmənin təsirini idarə etməyə və qış aylarında tələbatın ödənilməsinə kömək edib.
Böyük bir inkişaf 4 sentyabr 2024-cü ildə Maçike-Talian-Taru Cabba Ağ Neft Boru Kəməri Layihəsi üzrə Konsorsium Sazişinin imzalanması ilə baş verdi ki, bu da hökumətin enerji ilə özünü təmin etmək öhdəliyinə işarə edir.
Mineral sektorunda da məsləhətçilər qanunları beynəlxalq standartlara uyğunlaşdırmaq üçün çalışırlar və 2025-ci ilin ortalarında prosesin başa çatması gözlənilir. Pakistanın Geoloji Tədqiqat Xidməti (GSP) layihələri əsasında 51200 kvadratkilometr ərazinin xəritəsi tərtib edilib və faydalı qazıntıların kəşfiyyatı üçün vacib məlumatlar verən altı geofiziki tədqiqat aparılıb. Bu layihələr ölkənin ucqar rayonlarında iş yerləri yaradıb, sosial-iqtisadi inkişafa dəstək verib.
Nubar Süleymanova, “İki sahil”
