Kaliforniya və Merilend ştatlarının federal hakimləri ABŞ prezidenti Donald Trampın administrasiyasına 19 agentlikdə kütləvi ixtisarlar səbəbindən işini itirmiş minlərlə federal sınaq müddətində çalışan işçini işə bərpa etməyi əmr edib. Vətəninfo.az xəbər verir ki , bu barədə “Reuters” məlumat yayıb.
Donald Tramp və Hökumətin Səmərəliliyi üzrə rəhbəri Elon Maskın bürokratiyanı azaltmaq səyləri çərçivəsində minlərlə insan işini itirib.
Baltimor hakiminin dediyinə görə, son həftələrdə sınaq müddətində olan işçiləri kütləvi şəkildə işdən çıxaran idarələrdən 18-i qanunu pozub. Hakimin qərarı Ətraf Mühitin Mühafizəsi Departamentinə, İstehlakçıların Maliyyə Müdafiəsi Bürosuna, ABŞ Beynəlxalq İnkişaf Agentliyinə (USAID), Kənd Təsərrüfatı, Ticarət, Təhsil, Enerji, Səhiyyə, Daxili Təhlükəsizlik, Əmək, Nəqliyyat və bir sıra digər departamentlərə şamil edilir.
Baltimor hakiminin qərarından əvvəl ABŞ-ın San-Fransisko bölgə hakimi Müdafiə Departamenti də daxil olmaqla altı agentlikdə işdən çıxarılan sınaq müddətində olan işçilərin bərpasına göstəriş vermişdi.
San-Fransisko hakiminin qərarından sonra Ağ Evin mətbuat katibi Caroline Levitt administrasiyanın bununla “dərhal mübarizə aparacağını” bildirən bəyanat verib.
Tramp və Musk yanvar ayında vəzifəyə gələndə 2,3 milyon olan federal işçilərin sayını azaltmaq istəyirlər.
Kütləvi ixtisarların ilk dalğası sınaq müddətində olan işçilərə təsir etdi. Bu ixtisarlara qarşı iddia qaldıran Demokratların rəhbərlik etdiyi ştatlara görə, Trampın andiçmə mərasimindən bu yana ən azı 24 min adam işdən çıxarılıb.
