ABŞ prezidenti Donald Trampın Ukrayna müharibəsinə son qoymaq üçün Rusiyaya yaxın siyasət yürütməyə başlaması ilə Avropada təhlükəsizliklə bağlı narahatlıqlar artır.
Hafta.az-ın “Wall Street Journal”a istinadən yazdığına görə, Avropa ölkələrinin ABŞ-ın dəstəyi olmadan mühüm hava hücumundan müdafiə və kəşfiyyat paylaşma kanallarını itirə biləcəyi vurğulanır. Digər tərəfdən, Avropa ordularının ümumi gücünün nəhəng hava qüvvələri, donanma və möhkəm ordudan ibarət olduğu bildirilir.
Ekspertlər Rusiyanın Avropaya qarşı şərti müharibədə çətinlik çəkə biləcəyi ilə bağlı qiymətləndirməni bölüşürlər.
Londonda yerləşən Beynəlxalq Strateji Araşdırmalar İnstitutunun analitik mərkəzinin məlumatına görə, Avropa ölkələrində təxminən 32700 zirehli maşın, 2200 özüyeriyən haubitsa və 2100 döyüş təyyarəsi var.
Rusiyanın təxminən 10700 zirehli texnikası, 1400 özüyeriyən haubitsası və 1100 döyüş təyyarəsi var.
Bundan əlavə, Avropa ölkələrində ümumilikdə təxminən 5 min tankın olduğu paylaşılır. Rusiya ordusundakı tankların sayının 3 min olduğu bildirilir.
ABŞ Hərbi Hava Qüvvələrinin istefada olan generalı Filip Bridlav bəyan edir ki, Avropa orduları Rusiya ilə istənilən problemin öhdəsindən gəlməyə qadirdir.
Digər tərəfdən, təhlil Avropa ordularının pilotsuz təyyarələrlə döyüşlərdə təcrübəsiz olduğuna diqqət çəkir. Rusiyanın pilotsuz uçuş aparatları (PUA) sistemlərində “dünya lideri” olduğu, Avropanın isə Ukrayna müharibəsini araşdıraraq pilotsuz təyyarə texnologiyasını inkişaf etdirməyə çalışdığı yazılıb.
Avropa ölkələrinin Ukraynaya bağışladıqları hərbi texnika ilə öz arsenallarını zəiflətdiyi də bildirilir. NATO-nun baş katibi Mark Rutte Avropa Parlamentindəki çıxışında “Bizim sənayemiz hələ də çox kiçikdir” deyib.
