“Bu gün Azərbaycan Respublikasının Baş naziri Əli Əsədov Nazirlər Kabinetinin 2024-cü ildəki fəaliyyəti haqqında geniş hesabatla Milli Məclis qarşısında çıxış etdi. İlk olaraq, hesabatda səsləndirilən fikirlərin bir çox hissəsi ilə razılaşıram. Eləcə də, İmişli şəhərində iki qəzalı binanın təmiri ilə bağlı məktubuma müsbət cavab verdiyiniz üçün Sizə təşəkkürümü bilidirirəm. Bu məsələyə operativ yanaşdınız və sakinlər də sevinir”.
“Cebheinfo.az” xəbər verir ki, bunu parlamentin bugünkü plenar iclasında Milli Cəbhə Partiyasının (MCP) sədri, deputat Razi Nurullayev deyib.
O bildirib ki, hazırda İmişli şəhərinin 24 küçəsində işıqlandrma layihəsi həyata keçirilir və bu da çox əhəmiyyətlidir.
Deputat təklif edib ki, ölkənin əsas iqtisadiyyatı neft-qaz, bir sözlə, enerji ehtiyatları üzərində qurulub və ölkəmizin bu sahədə apardığı siyasət uğurludur:
“İqtisadiyyatın digər sahələrində də daha böyük uğurlara nail olmaq və kütləvi iş yerləri yaratmaq mümkündür. Bir çox sahələrdə müsbət irəliləyişlər olsa da, iqtisadiyyatın bəzi sahələrinə daha ciddi diqqətə ehtiyac yaranıb. Ölkəmizdə ənənəvi olaraq toy, yas, tikinti və kənd təsərrüfatı kütləvi iş yerləri yaradıb”.
R.Nurullayev Baş nazirə müraciətlə deyib ki, bütövlükdə azad olunmuş əraziləri çıxmaq şərtilə Azərbaycanın bütün ərazisi üzrə tikinti sahəsində ciddi çətinliklər var:
“Qanunlar və qaydaların daha da sadələşdirilməsinə, tələb olunan prosedurların yüngülləşdirilməsinə və bu sahədə baş verən gecikdirmələrin qarşısının alınmasına, tikinti icazələrinin verilməsinə tələb olunan zamanın bir neçə dəfə azaldılmasına ehtiyac var.
Bu sahədə aparılacaq islahatlar 10 minlərlə yeni iş yerlərinin yaradılmasına imkan verər və əmlak bazarında qiymətlərin artmasının qarşısını alardı. Bu gün əmlak bazarında olan qiymətlər xalqımızın qazancı ilə təmamilə tərs mütənasibdir.
Digər bir vacib məsələ yerlərdə tikintilərlə bağlıdır və keçən sessiyada ətraflı olaraq çıxış etmişəm. İcra hakimiyyətləri bu sahədə səlahiyyətsiz bir quruma çevrilib. Demək olar ki, bu sahədə icra hakimiyyətləri ilə heç bir problemi həll edə bilmirik. Çünki onların xeyli səlahiyyətləri əllərindən alınıb və hər kiçik məsələ üçün mərkəzi icra orqanlarına müraciət etmək lazım gəlir.
İcra hakimiyyətləri rayonlara cavabdehdir və zənnimcə bütün səlahiyytlər də onlarda olmalıdır ki, operativ şəkildə işləyə və rayonları inkişaf etdirə bilsinlər. Bu qədər mərkəzləşmə yerlərdə inkişafa ciddi əngəl yaradır. Kimsə kənddə malına tövlə tikirsə, çöl sahəsində müvəqqəti sığınacaq tikirsə, niyə icazəni Bakıdan almalı və aylarla cavab gözləməlidir?
Məgər həyətinə hasar çəkənin, evinə artırma edənin, balaca bir köşk tikənin, həyətində sanitar qovşaq tikənin belə icazəni Şəhərsalma və Arxitektura Komitəsindən alması absurd görünmürmü? Bu qaydalar vətəndaşlar arasında ciddi narazılıq yaratmala bərabər, bizim yerlərdə icra hakimiyyətləri və vətəndaşlarla səmərəli işləməyimizə də ciddi əngəl yaradır.
Bu məsələdə mütləq şəkildə asanlaşdırmaya, yüngülləşdirməyə ehtiyac var.
Rayonların inkişafını istəyiriksə, onların mərkəzdən asılılığı ciddi şəkildə azalmalıdır. Bu sahədə Sizdən kömək istəyirik cənab Baş nazir”.
Millət vəkili təklif edib ki, siz ölkənin iqtisadi inkişafına nail olmaq üçün hökumət üzvləri ilə billikdə çalışır və məqbul bildiyiniz addımları atırsınız:
“Cənab Baş nazir, yeni fikirlərə, ideyalara, fərqli təkliflərə daima ehtiyac var. Bunun üçün də sizdən ölkəmizdə fəaliyyət göstərən iqtisadçı alimləri, mütəxəssisləri, maliyyəçiləri, sabiq hökumət üzvlərini, sabiq nazirləri, bu sahədə fəaliyyət göstərən digər əlaqədar insanları “dəyirmi masa” formatında qəbul edib dinləmənizi xahiş edirəm. Özümü də o tərkibdə görmək istəyirəm.
Onların bir çoxu ilə görüşlərdə normal və xeyli mütərəqqi təkliflərinin olduğunu görür və inanıram ki, onların təklif və tövsiyyələri də hökumətin həyata keçirdiyi sosial-iqtisadi siyasətə əhəmiyyətli dərəcədə töhfə vermiş olardı. Ümid edirəm ki, bu təklifi dəyərləndirəcəksiniz”.
