Ağ Ev ABŞ ordusuna Donald Trampın Panama kanalını “geri almaq” məqsədinə nail olmaq üçün Panamada ABŞ qoşunlarının mövcudluğunu artırmaq variantlarını hazırlamağı əmr edib.
“NBC News” bu barədə martın 13-də planlarla tanış olan iki Amerika rəsmisinə istinadən məlumat yayıb. Qeyd olunur ki, keçən həftə Konqresə müraciətində Tramp bildirib ki, milli təhlükəsizliyi daha da gücləndirmək üçün onun administrasiyası “Panama kanalını geri qaytaracaq”. O vaxtdan bəri administrasiya rəsmiləri “qayıtmağın” nə demək olduğunu dəqiqləşdirməyiblər.
ABŞ Cənub Komandanlığı Panama təhlükəsizlik qüvvələri ilə daha sıx tərəfdaşlıqdan tutmuş ABŞ qoşunlarının Panama kanalını güc yolu ilə ələ keçirməsi ehtimalı az olan varianta qədər potensial planlar hazırlayır. Mənbələr bildirir ki, hərbi gücdən istifadə edilib-edilməyəcəyi Panama təhlükəsizlik qüvvələrinin ABŞ-la əməkdaşlığa nə dərəcədə razı olmasından asılıdır.
Kanalın mənbələri bildiriblər ki, Tramp administrasiyasının məqsədi Çinin oradakı təsirini, xüsusən də kanala çıxışını azaltmaq üçün Panamada ABŞ hərbi varlığını artırmaqdır. Rəsmilər “NBC News”a bildiriblər ki, ABŞ Cənub Komandanlığının rəhbəri admiral Alvin Halsi bu həftə müdafiə naziri Pit Heqsetə strategiya layihələrini təqdim edib. Heqsetin gələn ay Panama səfəri gözlənilir.
//Samir Qurbanov, Editor.az
