Yaponiya hökuməti cənub-qərbdəki Kyuşu adasında uzaqmənzilli raketlər yerləşdirməyi nəzərdən keçirir.
Day.Az-ın Kyodo agentliyinə istinadən verdiyi məlumata görə, bu addım yerli sakinlər arasında narahatlıq doğurub, çünki raketlərin potensial düşmən hədəfinə çevrilə biləcəyi ehtimal edilir. Söhbət təxminən 1000 km məsafəyə çata bilən, modernləşdirilmiş "Yer-gəmi" tipli "Tip-12" raketlərindən gedir.
Əgər raketlər Kyuşuya yerləşdirilərsə, onların uçuş məsafəsinə Koreya Xalq Demokratik Respublikası və Çinin sahilyanı əraziləri düşəcək. Yerləşdirmənin 2026-cı ilin martında başlaması planlaşdırılır.
Bununla yanaşı, Kyodo agentliyi bildirir ki, Yaponiya hökuməti bu tip raketləri Çinə daha yaxın olan Okinava adasında yerləşdirmək ehtimalını az hesab edir, çünki bu addım Tokio ilə Pekin arasında gərginliyi artıra bilər.
