Arxeoloqlar qazıntılar zamanı ikinci aralıq dövrü və Roma dövrünə aid məzar, həmçinin keramika emalatxanasını aşkar ediblər.
Vətəninfo.az xəbər verir ki, bu barədə Misirin Qədim Abidələr və Mədəni İrs Nazirliyinin yaydığı məlumatda bildirilib. Tapıntılar, Misir-Amerika arxeoloji qrupunun cənubi Misirdə, Abydosdakı Cebel Anubis nekropolunda apardığı arxeoloji qazıntılar zamanı aşkar edilib.
Nazirliyin bəyanatına görə, Misirin Ali Qədim Əsərlər Şurasına aid başqa bir arxeoloji qrup isə Sohag şəhəri yaxınlığında yerləşən Banavet kəndində Roma dövrünə aid keramika emalatxanasını gün üzərinə çıxarıb.
“Bu kəşf, Cebel Anubis nekropolundakı firon məzarları ilə bağlı yeni elmi dəlillər təqdim edir. Bu məzarlar eramızdan əvvəl 1700-1600-cü illərə aiddir,” – deyə nazirliyin məlumatında bildirilir.
Banavetdə aşkar edilən keramika emalatxanası ilə bağlı da açıqlama verən nazirlik, bu emalatxananın qədim dövrlərdə bölgəyə saxsı və şüşə məhsulları təmin edən ən böyük istehsal mərkəzlərindən biri olduğunu qeyd edib.
Nazirlik həmçinin vurğulayıb ki, bu kəşflər yalnız Misirin turizm müxtəlifliyini təşviq etmək və onun qədim sivilizasiyasını dünyaya təqdim etmək üçün deyil, həm də tədqiqatçılar üçün dəyərli məlumatlar təqdim etmək baxımından əhəmiyyətlidir.
