Bu gün Aşqabadda ölkənin özəl sektoruna kapitalın cəlb edilməsinə həsr olunmuş “Türkmənistanın gələcəyinə sərmayə” adlı beynəlxalq forumu işə başlayıb. Tədbirdə dövlət qurumları, beynəlxalq təşkilatlar, xarici şirkətlər və yerli biznes nümayəndələri bir araya gəlib.
Hafta.az-ın yazdığına görə, forumu giriş sözü ilə Türkmənistan Sənayeçilər və Sahibkarlar İttifaqı (İİET) İdarə Heyətinin üzvü Kərim Akməmmədov açıb. Mərasim çərçivəsində Türkmənistanın özəl sektorunun nailiyyətlərinə həsr olunmuş videoçarx nümayiş etdirilib.
Forumun proqramı kiçik və orta biznesin dəstəklənməsi, kənd təsərrüfatında innovasiyaların tətbiqi, eləcə də sənaye, tikinti, nəqliyyat və turizmin inkişafında özəl sektorun roluna həsr olunmuş bir neçə tematik bloka bölünüb. İştirakçılar beynəlxalq təcrübə və əməkdaşlıq perspektivlərini müzakirə edəcək, həmçinin yeni layihələr və investisiya təklifləri təqdim edəcəklər.
Forum ikitərəfli sənədlərin imzalanması, Türkmənistan şirkətlərinin yeni məhsullarının və investisiya təşəbbüslərinin təqdimatı ilə başa çatacaq.
