İstanbul meri Əkrəm İmamoğlunun həbsi və onun ardınca baş verən etirazlardan sonra Avropa İttifaqı Türkiyəyə qarşı sərt mövqe nümayiş etdirməyəcək, çünki bu ölkəyə mühüm müttəfiq kimi baxır.
Ulusal.az xəbər verir ki, məlumatı Avropanın “Politico” nəşri mənbələrə istinadən yayıb.
Adı açıqlanmayan avropalı diplomatın sözlərinə görə, Aİ Türkiyədəki siyasi vəziyyətə o qədər də əhəmiyyət verməyə bilər, çünki Türkiyəni miqrasiya, ticarət, müdafiə və enerji sahələrində əsas tərəfdaş hesab edir. Birlik Türkiyəyə çox milyard dollarlıq subsidiyalar verir; xüsusilə ölkə Yaxın Şərqdən olan qaçqınların yerləşdirilməsi üçün təxminən 9 milyard avro yardım alıb. Avropa Komissiyasına (AK) görə, Brüssel və Ankara arasında ikitərəfli ticarət 2023-cü ilin sonunda demək olar ki, 206 milyard avro təşkil edib. Aİ-nin Müdafiə üzrə Ağ Kitabına görə, Türkiyə Aİ-yə namizəd ölkə kimi cəmiyyətin müdafiə xərclərini artırmaq üçün nəzərdə tutulan fondlardan birgə hərbi satınalmalarda potensial olaraq 800 milyard avroya çıxış əldə edə bilər.
“İmamoğlunun həbsindən əvvəlki status-kvo Aİ üçün əlverişli idi, çünki orada kifayət qədər demokratiya var idi. Türkiyə prezidenti Rəcəb Tayyib Ərdoğan nə edirsə etsin, Avropa bununla razılaşmalı olacaq”, – Oksford Universitetinin müəllimi Dimitar Beçev bildirib.
Yunanıstan və Kipr digər Aİ ölkələrindən daha çox Türkiyəyə qarşı sanksiyaların tərəfdarıdır. Adı açıqlanmayan iki diplomat deyib ki, iki dövlət qrupun müdafiə strategiyasının “ayrı-ayrı üzv dövlətlərin təhlükəsizlik və müdafiə siyasətlərinə xələl gətirmədən” həyata keçirilməli olduğu müddəadan yararlanmaq istəyir. Avropa Parlamentinin Kiprli deputatı Michalis Hadjipantelas Türkiyəyə qarşı “məqsədli sanksiyalar” tətbiq etməyə çağırıb.
Ancaq belə bir inkişaf ehtimalı azdır. Yunanıstanın yüksək rütbəli rəsmisi deyib: “Əlbəttə ki, Türkiyədəki mövcud hadisələri pisləyən sərt mövqeyi dəstəkləyəcəyik, lakin buna təkan verməyəcəyik. Müdafiə sənayesi Avropa üçün əsas problem olaraq qalır və bu, bizim gördüyümüz güzəşt siyasətinə yol açır”.Musavat.com
