Son illər elektroavtomobillərdən istifadə edənlərin sayı dünyada və Azərbaycanda sürətlə artıb.
Buna səbəb ekoloji cəhətdən təmiz enerji ilə çalışan avtomobillərin, həm sərf olunan yanacaq, həm də hava çirkliliyi baxımından müsbət təsir göstərməsidir. Azərbaycanda, xüsusilə 2024-cü ildən etibarən ekoloji təmiz minik avtomobillərinin sayı rekord həddə çatıb. Bu barədə Media Təhlil Mərkəzinin məlumatında qeyd edilir. Statistikaya görə, son 5 ildə ölkəyə gətirilən minik avtomobillərinin böyük qismini yanacaq mühərrikli minik avtomobilləri təşkil etsə də, 2024-cü ildə ekoloji təmiz minik avtomobillərinin ümumi minik avtomobillərinin idxalında payı rekord həddə, yəni 35,45 faizə çatıb.
Lakin elektroavtomobillərə olan marağın artması ilə yanaşı, enerji doldurma məntəqələrinin sayının hələ də məhdud olması, sürücülər arasında bəzi narahatlıqlara səbəb olur. Sözügedən avtomobillərin şarj problemi daha qabarıq fonda üzə çıxır. Azərbaycanda 195 məntəqədə 430 elektrik doldurma cihazı quraşdırılıb. Sürücülər bunun qaneedici rəqəm olmadığı fikrindədirlər.
Bəs, yeni şarj məntəqələrinin sayı yetərlidirmi? Məntəqələrin qurulması üçün nə kimi stimullaşdırıcı tədbirlər görülə bilər?
Mövzu ilə bağlı nəqliyyat məsələləri üzrə ekspert Eldəniz Cəfərov Bizim.Media-ya danışıb.
“Ölkəmizdə enerjidoldurma məntəqələrinin sayı kifayət qədər deyil. Xüsusilə bölgələrdə məntəqələrin sayı artırılmalıdır. Cihazların bir hissəsini sahibkarlar, özəl qurumlar digər hissəsini isə dövlət qurumları təşkil edir. Ümid edirəm ki, dövlət stimullaşdırıcı tədbirlər həyata keçirəcək. Bunlar regionlarda enerjidoldurma məntəqələri, cihazları quraşdıran sahibkarlara müəyyən subsidiyaların verilməsi, güzəştlərın tətbiqi ola bilər",- deyə o vurğulayıb.
Ekspert artan tələbat fonunda infrastrukturların buna uyğun şəkildə genişlənməsinin vacib olduğunu da qeyd edib.
Ayşən Rəhim, Bizim.Media
