ABŞ-ın Dini Azadlıq Komissiyasının dünyada dini azadlıqların vəziyyətinə dair illik hesabatında Azərbaycanı yenidən ikilistandartlı, qərəzli mövqeyi ilə hədəfə alınıb. Hesabat Azərbaycan ictimaiyyəti tərəfindən irqçi, regionda sülh və barışığa mane olan, qeyri-obyektiv, ikili standartlı addım kimi qiymətləndirilməklə etirazla qarşılanıb.
Qeyd edək ki, Qərbi Azərbaycan İcması artıq bir neçə ildir ki, Azərbaycana qarşı qərəzini açıq şəkildə nümayiş etdirən sözügüdən komissiyanın öz hesabatlarında yer alan əsassız iddialarını pisləyib. Məlum hesabatın radikal erməni millətçilərinin hazırladığı uydurma məruzələrlə və bədnam, anti-Azərbaycan fəaliyyəti ilə seçilən, radikal erməni diasporası üzvlərinin əlində alət olan “Freedom House” təşkilatının sənədlərinə əsaslanaraq hazırlandığı bildirilib. Nədənsə komissiya azərbaycanlıların dini etiqadına görə Ermənistandan qovulmasına, vaxtilə işğal etdiyi Azərbaycan ərazilərindən bir milyondan çox azərbaycanlının total etnik təmizləməyə məruz qoyulmasına, 300-dən artıq məscid, yüzlərlə qəbirstanlığı dağıtmalarına və sair cinayətlərinə göz yumub. Hsabatda eləcə də işlədilən “Dağlıq Qarabağ” ifadəsi Azərbaycanın ərazi bütövlüyünə və suverenliyinə hörmətsizlik kimi önə ççıxan əsas faktordur. Qərb təsisatı yenə də ikili standartlarla çıxış edərək dini azadlıqları kobud şəkildə pozan, regionda sabitliyə əngəl yaradan Ermənistan haqqında bir kəlmə də yazmayıb.
Milli Məclisin ictimai birliklər və dini qurumlar komitəsinin üzvü, deputat Cavanşir Paşazadə Azərbaycanda mövcud olan yüksək dini etiqad azadlığına rəğmən ABŞ-da belə bir hesabatın hazırlanmasını ölkəmizə qarşı yönələn qərəzin, ədalətsziliyin bariz sübutu kimi önə çəkib. O, Azərbaycanda olan tolerantlığın bütün dünyaya bəlli olduğu halda belə bir hesabatın hazırlanmasını sülhə, sabitliyə qarşı yönələn qərəzli addım kimi dəyərləndirib.
“Azərbaycan dünyada ilk multikulturalizm institutunun yaradıldığı ölkələrdən biridir və artıq 10 ildir ki, fəaliyyət göstərir. Azərbaycanda multikulturalizm institutu yaradıldığı dövrdə dünya “bahar” çevrilişlərinin cəngində idi və hələ də böyük insan kütləsi o proseslərin ağır təsiri altında didərgin yaşamağa məcbur olub. Azərbaycanın torpaqları 30 ildən yuxarı erməni separatçılarının, Ermənistanın işğalı altında olsa da, Azərbaycanda 30 minə yaxın erməni yaşayıb və öz kilsələrində ibadətlərini ediblər. Başqa ölkələrdə olduğu kimi Azərbaycan erməniləri bir məhəlləyə yığıb özünü dünyaya nümayiş etdirməyib. İstər Ulu Öndər Heydər Əliyevin hakimiyyəti dövründə, istərsə də İlham Əliyevin 20 illik prezidentliyi dövründə ermənilər ayrı-ayrı kənd və şəhərlərimizdə yaşayıblar və onlar heç bir təsir və təzyiqlə üzləşməyiblər. Amma 30 il ərzində Azərbaycan torpaqları işğalda olan zaman Ermənistan və onun silahlandırdığı quldur hərbi dəstələri Azərbaycanın məscidlərini, ibadət yerlərini dağıdıb, dinimizi, etiqadımızı təhqir etmək üçün məscidlərimizdə donuz saxlayılar. Azərbaycan bu barədə dünyaya, UNESCO kimi təşkilatlara məlumat versə də, həmin qurumlar ölkəmizə səfər edib vəziyyəti yerində araşdırmaqdan çəkindilər. Hər kəs də yaxşı bilir ki, Ermənistanın Azərbaycana növbəti hücumu, işğal siyasətini genişləndirməsi cəhdinə qarşı 44 günlük müharibə başladı və zəfər çaldıq. Bu gün Qarabağda böyük bərpa işləri gedir. məscidlərlə yanaşı erməni vandallarının dağıtdığı o kilsələr də təmir olunur. Bütün bunlar Azərbaycanın dini etiqad azadlığına, ayrı-ayrı dinlərə hansı münasibətdə olduğunu və dini azadlıqların hansı ölkədə pozulduğunu açıq şəkildə göstərir. Deməli, ABŞ-ın Dini Azadlıq Komissiyası Azərbaycanla bağlı cəfəngiyyat uydurub”.
C.Paşazadə qeyd edib ki, bu cür hesabatlar Azərbaycana qarşı dini azadlığın müdafiəsi adı altında yönələn növbəti təzyiq formasıdır. Onun fikirncə, bu Prezident İlham Əliyevin apardığı siyasətə qarşı xarici güclərin iyrənc siyasətdir.
“Azərbaycan bütün dinləri, bütün peyğəmbərləri eyni hörmət, etiramla qəbul edir. Azərbaycanda bütün dinlər üçün şərait yaradılıb. Ona görə də ABŞ-ın Dini Azadlıq Komissiyasının Azərbaycanla bağlı hazırladığı hesabat absurddur. Bu, Azərbaycanın regionda və dünyada sülhyaratma məramına zərər vurmaq üçün atdığı ədalətsiz addımlardır”.
