Bakıda “Kolonializm: Dini-Milli Kimliyin Silinməsi” adlı beynəlxalq konfrans keçirilir.
“Qafqazinfo” “Report”a istinadən xəbər verir ki, Bakı Təşəbbüs Qrupunun təşkilatçılığı ilə baş tutan konfransda Fransa və Niderlandın müstəmləkə nəzarətində saxladığı ərazilərdən - Qvadelup, Fransız Qvianası, Kanaki (Yeni Kaledoniya), Korsika, Martinik, Reyunyon, Boneyr, Fransız Polineziyası, Mayot, eləcə də Valis və Futunadan müstəqillik hərəkatlarının liderləri və nümayəndələri, siyasi məhbus ailələri iştirak edirlər.
Tədbirdə kolonializm idarəçiliyi altında dini və milli kimliyin silinməsi, müstəmləkəçi dövlətlərin yerli xalqlara qarşı həyata keçirdiyi assimilyasiya siyasəti, o cümlədən ana dilin qadağan edilməsi və ya məhdudlaşdırılması, dini inanclara təzyiqlər, ad və soyadların məqsədli dəyişdirilməsi, tarix və mədəniyyətin imperiya siyasətinə uyğun yazılması kimi narahatedici məsələlər geniş şəkildə müzakirə ediləcək.
Həmçinin kolonial siyasətin nəticələri, müstəmləkəçiliyə qarşı qlobal hərəkatlar, milli irsin qorunması, siyasi məhbusların azadlığı, reparasiya tələbləri, habelə Fransa və Niderland hökumətlərinin nyu kolonial siyasəti ətrafında fikir mübadiləsi aparılacaq.
Bundan əlavə, konfrans zamanı Bakı Təşəbbüs Qrupu ilə müstəqillik hərəkatlarından biri arasında Anlaşma Memorandumunun imzalanması gözlənilir.
Qvadelupanın Azadlığı Naminə Xalq Birliyinin sədri Jan-Jakob Bisep Bakıda keçirilən “Kolonializm: Dini-Milli Kimliyin Silinməsi” adlı beynəlxalq konfransda deyib ki, Qvadelupa əhalisi adada fransız dilinin rəsmiləşdirilməsinə qarşıdır.
O qeyd edib ki, Qvadelupada fransız dilinin rəsmiləşdirilməsi cəhdi adada assimilyasiya prosesinin tərkib hissəsidir:
“Assimilyasiya isə kütləvi qırğın silahıdır. Afrikalılar əsrlər boyu buna məruz qalıblar. Onlar sivil cəmiyyətə çevrilmək adı ilə xristianlaşdırılırdılar. Quldarlığa məruz qalan xalqların mədəniyyəti təhdid kimi görüldüyü üçün məhdudlaşdırılırdı”.
O qeyd edib ki, Qvadelupa öz mədəniyyətini və ənənələrini yaşatmağa çalışır:
“Biz istəyirik ki, rəqslərimiz, musiqimiz, ənənələrimiz yaşasın, öz dilimiz qorunsun. Buna görə, müstəmləkəçiliyə məruz qalan digər xalqlarla birgə mübarizə aparmalıyıq. Müxtəlifliyimiz bizim gücümüzə çevrilməlidir”.
Bakı Təşəbbüs Qrupunun (BTQ) icraçı direktoru Abbas Abbasov da “Kolonializm: Dini-Milli Kimliyin Silinməsi” adlı beynəlxalq konfransda danışıb.
“Məlum olduğu kimi, təşkilatımız 2023-cü ilin iyul ayında fəaliyyətə başlayıb. Qürurla deyə bilərəm ki, təsis olunduğumuz vaxtdan cəmi dörd ay ərzində yeddi müstəmləkə ərazisi ilə əməkdaşlıq qurduq. Bu gün isə onların sayı 15-ə çatıb. BTQ fəaliyyətdə olduğu iki ildən az müddət ərzində 20-dən çox beynəlxalq konfrans keçirib”, - o qeyd edib.
A.Abbasov bildirib ki, 2024-cü ildən etibarən, BTQ həmçinin analitik mərkəz funksiyasını yerinə yetirir:
“Təşkilatımızın çox gənc olmasına baxmayaraq, müasir dünyada müstəmləkə siyasətini və onun yerli əhaliyə zərərli təsirini ətraflı təsvir edən 10 hesabat hazırlamağa və iki kitab nəşr etməyə nail olduq.
Bundan əlavə, müstəmləkəçilik və neokolonializmlə mübarizə aparan təşkilatlarla altı əməkdaşlıq memorandumu imzalamışıq. Bu gün isə yeddincisini imzalayacağıq. Hesab edirəm ki, bu böyük nailiyyətdir”.
