“Milan”ın ingiltərəli mərkəz yarımmüdafiəçisi Ruben Loftus-Çik təcili surətdə cərrahi əməliyyat masasına qaldırılıb.
Arena.az bu barədə “Football Italia” dərgisinə istinadən istinadən məlumat verir.
Loftus-Çik İtaliya A Seriyasının 30-cu turunun səfərdə “Napoli” ilə oyunu (1:2) ərəfəsində, “rossoneri”nin yerləşdiyi mehmanxanada ikən, qarnında güclü ağrılar hiss edib. Köməyə gəlmiş həkimlər futbolçunu yerli xəstəxanaya çatdıraraq, müayinədən keçiriblər. Kəskin appendisit müəyyənləşdirilmiş Loftus-Çik təcili cərrahi əməliyyat edilib.
Hazırda futbolçunun səhhətinin sabit olduğu bildirilir.
Mərkəz yarımmüdafiəçisi Ruben Loftus-Çik “Çelsi”nin məzunudur. Karyerası ərzində həmçinin “Kirstal Pelas” və “Fulhem”də oynamış Loftus-Çik, 2023-cü ilin iyul ayında 18,90 milyon avro məbləğ müqabilində “Çelsi”dən tamhüquqlu əsasda “rossoneri”nin düşərgəsinə keçib. İngiltərəli futbolçunun “Milan”la müqaviləsinin müddəti 2027-ci iliin iyun ayının sonuna qədər qüvvədədir.
Cari mövsümdə Loftus-Çik “Milan” üçün 32 oyun keçirib, 1 məhsuldar ötürmə verib.
Loftus-Çikin “rossoneri” üçün çıxışının ümumi mənzərəsi 62 oyun, 10 qol və 3 məhsuldar ötürmədən ibarətdir.
Ruben Loftus-Çik 2017-ci ilin noyabr ayında debüt etdiyi İngiltərə yığmasının heyətində 10 oyuna çıxıb, 2 məhsuldar ötürmə ilə fərqlənib.
“Transfermarkt” internet-portalı 29 yaşlı ingiltərəli mərkəz yarımmüdafiəçisinin transfer dəyərini 16 milyon avro məbləğində qiymətləndirir.
