“31 martda keçirilən anım tədbirləri xalqımızın tarixi yaddaşını qorumaq, gələcək nəsillərə ötürmək və beynəlxalq ictimaiyyəti məlumatlandırmaq baxımından vacibdir”.
Hafta.az xəbər verir ki, bu barədə Milli Məclisin bugünkü iclasında deputat Azər Badamov bildirib.
Deputat dünən Azərbaycanlıların Soyqırımı Günü ilə bağlı anım tədbirlərinin keçirilməsinə diqqət çəkərək erməni vandalları və havadarlarının iştirakı ilə törədilən soyqırım tarixi faktlarını qeyd edib.
“1992-ci ildə Xocalıda törədilmiş soyqırımı ilə 1918-ci ildə törədilmiş soyqırımları eyni vəhşiliklə həyata keçirilmişdir. Bu, 1918-ci ildən 74 il keçməsinə baxmayaraq erməni təfəkkürünün mahiyyətinin dəyişmədiyini göstərir.
Prezident İlham Əliyevin rəhbərliyi altında Azərbaycan dövləti 44 gündə ərazilərini düşmən işğalından azad etməklə regionda yeni reallıq yaratdı. Bu gün azad olunmuş ərazilər sürətlə yenidən qurulur. Qısa zaman kəsiyində 13 yaşayış məntəqəsinə keçmiş məcburi köçkünlərin qayıtması və onların öz doğma ata yurdlarında həyatlarına davam etməsi dövlətimizin gücünü göstərir. Təbii ki, Qarabağ və Şərqi Zəngəzurun hər bir guşəsi yenidən qurulub cənnətə çevriləcəkdir.
Biz müharibənin başa çatdığı ilk gündən sülh və əməkdaşlıq içində yaşamaq üçün Ermənistana çağırış etdik. Çünki, biz Cənubi Qafqazı sülh və əməkdaşlıq regionu kimi görmək istəyirik. Amma düşmən özünü sülhsəvər kimi təqdim edərək beynəlxalq ictimaiyyəti aldadır və müxtəlif tribunalardan istifadə etməklə çirkin niyyətlərindən əl çəkmir. Belə ki, Almaniyanın Deutçe Velle kanalında nümayiş etdirilmiş film və prezident Frank Valter Ştaynmaerin Cənubi Qafqaza səfəri çərçivəsində instagram səhifəsində nümayiş etdirilən əski parçası heç də təsadüfdən irəli gəlməyib. Bu, Ermənistanın bacısı Fransanın və onun təsiri altında olan Almaniyanın Azərbaycana olan münasibətinin göstəricisidir. Əgər onlar beynəlxalq hüququ və ədaləti dəstəkləsəydilər 1 milyon qaçqın və məcburi köçkünümüzün yaşadığı aci taleyi, yerlə-yeksan edilmiş 300-dən çox yaşayış məntəqəmizin məhv edilməsini televiziya kanallarında nümayiş etdirərdilər. Təbii ki, biz heç kimdən nə inciməli, nə də nəsə gözləməliyik. Nə qədər ədalətli niyyətdən çıxış etsək də bizə qarşı ikili standartlardan yanaşmalar davam edəcəkdir. Ona görə də bizim yeganə yolumuz daxili və xarici düşmənlərimizə bir daha fürsət verilməməsi üçün dövlət başçımızın ətrafında birləşmək və Vətən üçün mübariz olmaqdır. Çünki ancaq güclü Azərbaycan dövləti hayların arxasında dayanaraq regiona sülhün və əməkdaşlığın gəlməsinə mane olanlara da öz ədalətli mövqeyini qəbul etdirəcəkdir”.
