Ştaynmayer nədən belə sərsəm addım atdı?..
Xəbər verildiyi kimi, Almaniya prezidenti Frank-Valter Ştaynmayerin Ermənistanda səfərdə olarkən qondarma «Dağlıq Qarabağ» separatçılarının bayrağı ilə post paylaşması Bakı ilə Berlin arasında diplomatik gərginlik yaradıb. Nəticədə martın 31-də Almaniyanın Azərbaycandakı səfiri Ralf Horlemann Xarici İşlər Nazirliyinə çağırılıb. Səfirlə görüş zamanı, Almaniya Federativ Respublikasının Prezidenti Frank-Valter Ştaynmayerin Ermənistana səfəri çərçivəsində rəsmi Instagram səhifəsində Azərbaycanın keçmiş işğal olunmuş ərazilərində yaradılmış qondarma rejimin “bayrağını” paylaşmaqla ölkəmizin ərazi bütövlüyü və suverenliyinə qarşı edilmiş paylaşıma görə kəskin etiraz bildirilib. Bölgəyə səfər zamanı bu açıq siyasi təxribatın qəbuledilməz olduğu, Almaniya tərəfinin bu paylaşıma görə ictimai şəkildə üzrxahlıq etməsinin zəruriliyi diqqətə çatdırılıb.
Almaniya Prezidentinin bu paylaşımının Azərbaycanın ərazi bütövlüyü və suverenliyinin dəstəkləndiyi barədə bəyanatlara və davam edən sülh prosesinə zidd olduğu vurğulanıb.
Bundan sonra Almaniya Federativ Respublikasının Prezidenti Administrasiyasının rəhbəri Dövlət katibi Dörte Dinger
Azərbaycan Respublikası Prezidentinin köməkçisi Hikmət Hacıyevə məktub göndərərək baş vermiş yanlışlığın üzə çıxarıldqdan sonra dərhal aradan qaldırıldığını bildirib və rəsmən üzr istəyib.
O, belə deyib:
“Bu paylaşım texniki səhv səbəbindən dərc edilib və Almaniyanın Azərbaycanın ərazi bütövlüyünə dair məlum mövqeyi ilə bağlı heç bir məna kəsb etmir. Belə bir səhvə yol verilməsinə görə çox məyusam. Paylaşımın Azərbaycanda bəzi insanlarda yaratdığı yanlış təəssürata görə səmimi-qəlbdən üzr istəyirəm”.
Doğrusu, bunun texniki səhv olması inandırıcı görsənmir. Bəs görəsən, o boyda Almaniya prezidenti suverenliyinə, ərazi bütövlüyünə sataşdığı bir dövlətdən enində-sonunda üzr istəyəcəyini bilə-bilə nədən belə sərsəm bir addım atıb?..
Mövzu ilə bağlı Moderator.az-a açıqlmasında sabiq baş diplomat Tofiq Zülüfqarov bunları söyləyib:
“Ümumiyyətlə, bilirsiz ki, Almaniya dövlət olaraq bir çox xarici qüvvələrin siyasi və digər təsirləri altındadır. Hesabınızı ondan götürün ki, bu ölkənin xüsusi xidmət orqanları öz dövlət başçısının gizli danışıqlarının audio-yazısını ABŞ-yə ötürür. Söhbət Angela Merkelin hakimiyyətdə olduğu dövrdəki qalmaqaldan gedir. Bu, sübut edir ki, həmin dövlətin bir çox qurumlarında xarici təsir güclüdür. Mən bunu çoxdan bilirdim; Fransanın və digər aparıcı Avropa İttifaqı üzvlərinin Almaniya Xarici İşlər Nazirliyindəki təsiri yetərincədir. Hətta onlar öz aralarında müxtəlif mövzulara dair müzakirələr apararaq ortaq mövqeyə gəlirlər...
O da bəllidir ki, prezident Ştaynmayer əslində dövlətdə simvolik bir fiqur olmaqla real hakimiyyətə malik deyil. Konstitusiyaya görə onun xarici siyasətdə müəyyən qədər məhdud seremonial funksiyaları var. Özü də Ştaynmayer insan haqlarıyla bağlı hansısa QHT-dən siyasətə gələn o qədər də siyasi təcrübəsi olmayan bir fiqurdur. Yəni bu şəxsə təsir etmək çox asandır. Bu səbəbdən istisna etmirəm ki, Avropadakı hansısa anti-Azərbaycan qüvvələr Almaniya prezidentinin Ermənistana səfərindən bu şəkildə istifadə etmək istəyiblər. Özü də birinci dəfə deyil ki, Almaniyada Azərbaycana qarşı belə xətalara yol verirlər...
Azərbaycanda isə dünənədək bəziləri düşünürdü ki, Avropada əvvəllər Fransa vasitəsilə təmsilçiliyi Almaniyaya dəyişib nəyəsə nail olmaq mümkündür. Amma təəssüf ki, bu, mümkün olmur. Çünki indiki mərhələdə Alamniyanın siyasi elitası çox zəifdir. Baxın, görün Tramp Almaniya kansleri Olaf Şoltsla da görüşdən imtina edib. Yəni bir növ bu dövlətə yuxarıdan aşağı baxırlar...
Onu da deyim ki, əslinə qalsa, Almaniya prezidentinin bu yanlışlığı, bu xətası bizim xeyrimizə oldu. O, Azərbaycana səfəri zamanı sübut etməlidir ki, Ermənistan məsələsində balanslaşdırılmış bir mövqeyi var. Onsuz da Ştaynmayeri vasitəçi kimi qəbul edən yox idi. İndi də o, Bakıda hər bir kölgədən ehtiyat edəcək. Özü demirdi ki, mən sülh yaranmasından sizə kömək etmək istəyirəm? Ermənilər də deyirdi ki, gəlin tez sazişə qol çəkək. Amma Almaniya prezidentinin bu yanlışlıq hesab edilən təxribatı işləri elə korladı ki, onu Azərbaycanda söyməyən qalmadı...”
Sultan Laçın
