Bakı, 1 aprel, AZƏRTAC
Asiya İnkişaf Bankı (AİB) zəlzələdən zərər çəkmiş Myanma xalqının fövqəladə və humanitar ehtiyaclarını dəstəkləmək üçün 3 milyon dollar ayıracaq.
AZƏRTAC xəbər verir ki, AİB-nin Direktorlar Şurası tərəfindən hazırlanan qrant BMT-nin Ümumdünya Ərzaq Proqramı vasitəsilə ərzaq, tibbi ləvazimat və sığınacağın alınması üçün nəzərdə tutulub.
Asiya İnkişaf Bankından bildirilib ki, zəlzələ Myanmada davam edən humanitar böhranı gücləndirib və xalqın üzləşdiyi mövcud problemlərə aktuallıq əlavə edib.
Xatırladaq ki, martın 28-də Myanmada 7,7 bal gücündə zəlzələ olub. Zəlzələdən sonra 2,8-7,5 aralığında 12 afterşok qeydə alınıb. Yeraltı təkan paytaxt Naypyida şəhəri və Mandalay regionunda xeyli dağıntıya səbəb olub. Bəzi yaşayış məntəqələrində elektrik təchizatı və mobil rabitə sistemi pozulub. Paytaxt ilə ölkənin ən böyük şəhərini birləşdirən magistral yola, xüsusən də körpülərə və yol ötürücülərinə ziyan dəyib. Nəticədə yolun müəyyən hissəsindən istifadə etmək mümkün deyil.
