Bakı Ağır Cinayətlər Məhkəməsində Toplum TV-nin həmtəsisçiləri Akif Qurbanov, media eksperti Ələsgər Əhmədoğlu (Məmmədli), III Respublika platformasının təsisçisi Ruslan İzzətli, habelə Ramil Babayev, Əli Zeynalov, Müşviq Cabbarov, İlkin Əmrahov, Fərid Abbasovun cinayət işi üzrə məhkəmənin hazırlıq iclası keçirilib.
"Unikal" haqqin.az-a istinadən xəbər verir ki, hakim Azər Tağıyevin sədrliyi ilə keçirilən prosesdə məlum olub ki, təqsirləndirilən Akif Qurbanovun vəkili Fuad Ağayev iş materialları ilə tanış olmaq üçün iclasın iki həftə təxirə salınmasını xahiş edərək məhkəməyə məktub göndərib.
III Respublika platformasının həmtəsisçisi Akif Qurbanov məhkəmənin müstəqilliyinə inanmadığını iddia etməyə başlayıb. Hakim cavab verib ki, “heç bir təzyiq ola bilməz və belə hallar istisnadır”.
Media eksperti Ələsgər Məmmədli həbsdə olduğu müddətdə səhhətinin pisləşdiyini və təcili cərrahiyyə əməliyyatına ehtiyac olduğunu bildirib. Məmmədlinin vəkili Fəxrəddin Mehdiyev müvəkkilinin səhhətinin pisləşdiyini təsdiqləyib və onun ev dustaqlığına keçirilməsi məsələsinə baxılmasını istəyib:
“...Xəstəliyi pisləşib, boğaz nahiyəsində şiş aşkarlanıb, təzyiqi stabil deyil, vəziyyəti kritikdir, ciddi fəsadlar yaranıb... Ən azından eç olmasa, qabaqlayıcı tədbiri dəyişmək lazımdır...”.
Digər vəkillər də müvəkkillərinin ev dustaqlığına buraxılması ilə bağlı vəsatətlər veriblər. Məhkəmə hazırkı mərhələdə vəsatətləri təmin etməkdən imtina edib.
Hazırlıq iclası aprelin 24-dək təxirə salınıb.
Xatırladaq ki, ötən il martın 6-da Daxili İşlər Nazirliyi Toplum TV internet televiziyasının ofisində və digər ünvanlarda əməliyyat keçirib. Toplum TV-nin həmtəsisçiləri Akif Qurbanov, Ələsgər Əhmədoğlu (Məmmədli), telekanalın əməkdaşları və III Respublika platformasının təsisçisi Ruslan İzzətli barəsində həbs qətimkan tədbiri seçilib.
Onlara qarşı Azərbaycan Cinayət Məcəlləsinin 206.3.2-ci (qaçaqmalçılıq, qabaqcadan əlbir olan bir qrup şəxs tərəfindən törədildikdə) maddəsi ilə cinayət işi açılıb. Daha sonra təqsirləndirilən şəxslərə Cinayət Məcəlləsinin 162-1.1, 192.3.2, 193-1.3.1, 193-1.3.2, 206.4, 213.2.1-ci maddələri ilə əlavə ittihamlar irəli sürülüb.
