ABŞ Prezidenti Donald Trampın imzaladığı fərman Çinə 34%, Avropa İttifaqına 20%, Vyetnama 46%, Tayvana 32%, Yaponiyaya 24%, Hindistana 26%, Türkiyə və Azərbaycana 10% "qarşılıqlı" vergilər tətbiqini nəzərdə tutur.
Ölkə.Az xarici KİV-ə istinadla xəbər verir ki, bir sıra ölkə və təşkilatlar bu vergi qərarına tənqidi münasibət bildirib.
Avropa Komissiyasının sədri Ursula fon der Leyen tarifləri "qlobal iqtisadiyyata böyük zərbə" kimi qiymətləndirib.
"Nəticələr dünyada milyonlarla insan üçün ağır olacaq. İstehlakçılar bunu dərhal hiss edəcəklər, ən həssas vətəndaşlar xüsusilə zərər görəcəklər. Böyük və ya kiçik bütün müəssisələr ilk gündən mənfi təsirlənəcək” - o bildirib.
Çinin “Global Times” qəzetində dərc olunan rəy yazısında Trampın açıqlaması “vergi şantajı” kimi qiymətləndirib. Çinin Ticarət Nazirliyi ABŞ-nin tətbiq etdiyi tarifləri pisləyib və "qətiyyətli əks tədbirlər" görəcəyini bildirib.
"Bu, birtərəfli zorakılığın tətbiqidir. Bu, təkcə ABŞ-nin öz maraqlarına zərər verməyəcək, həm də qlobal iqtisadi inkişafa və təchizat zəncirinin sabitliyinə təhlükə yaradacaq".
İtaliyanın baş naziri Corciya Meloni ABŞ-nin Avropa İttifaqına (Aİ) gömrük rüsumları tətbiq etmək qərarını “yanlış tədbir” adlandırıb.
Dünya bazarlarını izləyən “Market Watch” "Trampın tariflərinin ən pis ssenaridən daha pis" olduğunu yazıb.
İspaniyanın "El Pais" qəzeti xəbəri "Tramp qlobal ticarət müharibəsi başlatdı" başlığı ilə dərc edib.
"Tramp bu bəyanatı digər ölkələrin ABŞ-a qarşı qoyduğu maneələrlə bağlı yalan iddialara əsaslanan qəzəbli və intiqam dolu çıxışı ilə etdi. Keçən əsrdə tətbiq edilən ən yüksək tariflər qlobal iqtisadiyyatın gələcəyini qaraldır", - deyə nəşr yazıb.
Britaniyanın "Daily Express" qəzeti isə məlumatı "Breksitdən (Böyük Britaniyanın Avropa Birliyindən ayrılması) sonra Böyük Britaniya Trampın vergilərinin ən ağırından qaçdı" başlığı ilə oxucularına çatdırıb.
Həmçinin Britaniyanın Kiçik Biznes Federasiyası (FSB) qərarın kiçik və orta biznesə "böyük zərbə" vuracağını bildirib.
Billurə Yunus
