Görkəmli bəstəkar Nəriman Məmmədova həsr olunmuş xatirə gecəsi keçirilib

Bakı, 26 aprel, AZƏRTAC

Azərbaycan Musiqi Mədəniyyəti Dövlət Muzeyində görkəmli Azərbaycan bəstəkarı, əməkdar incəsənət xadimi, Xalq artisti Nəriman Məmmədova həsr olunmuş xatirə gecəsi keçirilib.

AZƏRTAC xəbər verir ki, muzeyin direktoru, sənətşünaslıq üzrə elmlər doktoru, Əməkdar mədəniyyət işçisi Alla Bayramova, muzeyin şöbə müdiri Xanım Abdinova, Nəriman Məmmədovun qızı, Bakı Musiqi Akademiyasının dosenti, sənətşünaslıq üzrə fəlsəfə doktoru Kaminə Məmmədova bəstəkarın yaradıcılıq yolu, musiqi mədəniyyətimizdəki xidmətlərindən danışıblar. Onların çıxışı Azərbaycan Musiqi Mədəniyyəti Dövlət Muzeyinin və Nəriman Məmmədovun şəxsi arxivi əsasında hazırlanmış slayd-şou ilə müşayiət olunub. Pedaqogika üzrə elmlər doktoru, professor Nazim Kazımov Nəriman Məmmədovla bağlı xatirələrini bölüşüb.

Tədbirdə bəstəkar, Xalq artisti Tofiq Bakıxanov, Ü.Hacıbəyli adına Bakı Musiqi Akademiyasının professoru, Xalq artisti Ülviyyə Hacıbəyova və başqa incəsənət xadimləri də çıxışlar ediblər.

Tədbirin bədii hissəsində Nəriman Məmmədovun əsərlərindən ibarət konsert proqramı təqdim olunub, bəstəkarın müsahibələri və əsərlərinin musiqi ifaları olan videoyazılar nümayiş edilib.