Sabiq məşqçi prezident seçildi

“Portu”nun yeni prezidenti müəyyənləşib. Bu vəzifəyə klubun sabiq baş məşqçisi seçilib.

Seçkidə Andre Villaş-Boaş qalib gəlib.

O, səslərin 80,28 faizini qazanaraq 42 il idi “Portu”nun prezidenti olan Pintu da Koştaya qalib gəlib. Xatırladaq ki, Villaş-Boaş 2010/11 mövsümündə “Portu”nun baş məşqçisi olub. O, bu klubdakı uğurlu işindən sonra İngiltərədə “Çelsi” (2011/12) və “Tottenhem”i (2012/13) də çalışdırıb. Sonra “Zenit” (2014-16) və “Şanxay SIPG”də (2016/17) də çalışan portuqaliyalı 2021-ci ildə baş məşqçisi olduğu “Marsel”dən ayrıldıqdan sonra isə heç bir klubda işləmirdi.

46 yaşlı məşqçi son illər gücünü avtoralli idmanında sınaması ilə diqqəti cəlb etmişdi.