Luis Enrike PSJ-nin mümkün kvadruplu haqda dəm vurdu

PSJ-nin baş məşqçisi, ispan mütəxəssis Luis Enrike Fransa nəhənginin bu mövsüm mümkün kvadrupl etmək imkanı haqda danışıb.

Arena.az xatırladır ki, PSJ Fransa Liqa 1-in 31-ci turunda “Monako”nun “Lion”a uduzmasından (2:3) sonra milli birinciliyin çempionluğunu artıq təmin edib.

Həmçinin parislilər Fransa Super Kubokunun finalında “Tuluza”nı 2:0 hesabı ilə məğlub edilər. Fransa Kubokunun finalında isə PSJ-ni mayın 25-də Lion “Olimpik”i ilə oyun gözləyir.

“Burada olandan bəri oyunçuların və klubun dəstəyini hiss etmişəm, biz təkmilləşmə mərhələsindəyik. Bu isə hələ bu layihənin başlanğıcıdır. Mövsümün sonuna bir ay qalıb və biz hələ dörd turnirin hamısında qalib gələ bilərik. Biz duyğularımızın öhdəsindən yaxşı gəlməliyik və təzyiqi təhlükə kimi qəbul etməməliyik”, – UEFA-nın rəsmi saytı Enrikenin sözlərini sitat gətirir.

Bu gün, mayın 1-də PSJ Çempionlar Liqasının yarımfinal mərhələsinin ilk oyunu çərçivəsində səfərdə Dortmund “Borussiya”sı ilə qarşılaşacaq. Oyuna Bakı vaxtı ilə saat 23:00-da start veriləcək.