Üzünüzü yumazdan əvvəl iki dəfə düşünün...

Sızanaq və qara nöqtələrdən qorunmaq üçün ən yaxşı həll yolunun gündə iki dəfə üzünüzü yumaq olduğunu eşitmiş ola bilərsiniz. Hətta hər səhər və axşam sevimli dəri təmizləyicinizdən istifadə etmək də tövsiyə edilmiş ola bilər.

Day.Az medicina.az-a istinadən xəbər verir ki, dermatoloqlar dərini çox tez-tez, xüsusilə də sərt kimyəvi maddələrlə yumağın çox zərərli olduğunu bildirirlər.

Həddən artıq təmizləmək dərinin pH balansını pozur!

Dəri təmizləyici məhsullar yaxşı bakteriyaları məhv edə və dərinin pH balansını poza bilər. Əgər gündə iki dəfə üzünüzü yuyan birisinizsə, səhər yumadan imtina etmək faydalı ola bilər. Ancaq makiyaj edənlərin axşam üzünü mütləq yuyaraq təmizləməsi vacibdir.

Kran suyu dəriyə zərərlidir!

Kran suyunun keyfiyyəti yaşadığınız bölgədən asılı olaraq dəyişir. Adətən, tərkibindəki sərt minerallar səbəbiylə dərinin qurumasına və qıcıqlanmasına səbəb olur. Bu səbəbdən dərinin təmizlənməsi zamanı həddindən artıq su istifadəsini azaltmaq faydalı ola bilər.

Dərini miselyar su və toniklə təmizləyin!

Üzünüzü təmizləyərkən daha az su istifadə etmək ziddiyyətli səslənə bilər. Amma bu, mümkündür. Belə ki, bunun üçün miselyar sulardan və toniklərdən istifadəyə üstünlük vermək olar. Dəri tipinizə və dərinizin ehtiyacına görə miselyar su və tonik seçmək çox faydalı olacaq. Dəriniz yağlı və ya qırışlara meyllidirsə, su əsaslı təmizləyicilər və toniklər idealdır. Əksinə quru və qıcıqlanan dəri üçün yağ əsaslı məhsullar uyğun olacaq.