Nepal məhkəməsi Everesti fəth etmək üçün icazələrin sayını azaltmaq qərarına gəlib

Bakı, 4 may, AZƏRTAC

Nepalda Ali Məhkəmə Everest zirvəsinə qalxmaq üçün verilən icazələrin sayını məhdudlaşdırmaq barədə qərar çıxarıb.

AZƏRTAC xəbər verir ki, bu barədə yerli "Respublika" nəşri məlumat yayıb.

Məsələyə baxılmasına səbəb vəkil Dipak Bikrom Mişranın verdiyi ərizə olub.

Məhkəmə icazələrin verilməsini azaltmaqla yanaşı, qurbanların təcili təxliyəsi üçün təyyarəyə ehtiyac duyulduğu hallar istisna olmaqla, baza düşərgələri ilə zirvə arasında səyahət etmək üçün vertolyotlardan istifadəni də qadağan edib. Bundan əlavə, indi Everestə qalxmaq istəyənlər ərizədə alpinistlər qrupunda neçə nəfərin olacağını qeyd etməli və özləri ilə aparacaqları əşyaların siyahısını əlavə etməlidirlər.

Nepal Turizm Departamentinin məlumatına görə, 2023-cü ildə 478 xarici ölkə vətəndaşına Everestə qalxmaq icazəsi verilib, onlardan 287 nəfəri zirvəyə qalxa bilib. Daha 359 alpinist “Şerpa” bələdçilərinin köməyi ilə dağa qalxıb. Beləliklə, Yer kürəsinin ən yüksək zirvəsini ziyarət edənlərin ümumi sayı 646 nəfər olub.

Nepalın Ali Məhkəməsi öz qərarında ölkə üçün turizmin əhəmiyyətini vurğulasa da, dağa dırmanmanın populyarlığının Everestin ekologiyasını təhdid etdiyinə diqqət çəkib.