Rusiya-Ukrayna müharibəsi davam edərkən Putin nüvə kartını masaya qoydu. İngiltərə və Fransanın ardıcıl təhdidlərindən sonra Kreml hərəkətə keçdi. Nüvə silahı ssenarilərinin tətbiqi ilə bağlı tapşırıqlar alan Rusiya Müdafiə Nazirliyi silahların hazırlanması və yerləşdirilməsi üçün təlimlər keçirəcək.
Turkustan.az xəbər verir ki, Rusiya prezidenti Vladimir Putin Ukrayna yaxınlığındakı qoşunlara “düşmənləri çəkindirmək” üçün nüvə silahı ssenarilərini tətbiq etməyi əmr edib. Müdafiə Nazirliyi hərbi təlimlərə nüvə silahının hazırlanması və yerləşdirilməsi üzrə təlimlərin də keçiriləcəyini iddia edib. Nazirlik təlimlərin bəzi Qərb rəsmilərinin Rusiyaya qarşı təxribat xarakterli bəyanatlarına və təhdidlərinə cavab olaraq həyata keçiriləcəyini bildirib.
Bildirilir ki, Böyük Britaniyanın xarici işlər naziri Lord Cameron və Fransa prezidenti Emmanuel Makronun son həftələrdə Rusiya ilə bağlı təhdid dolu açıqlamaları Rusiyanı hərəkətə keçirib. RİA xəbər agentliyinə danışan rusiyalı diplomat Qriqori Maşkov deyib: “Biz hazırda açıq münaqişə mərhələsindəyik və ümid edirəm ki, bu, birbaşa silahlı münaqişə ilə nəticələnməyəcək”. Maşkov bunun 1962-ci ildəki Kuba Raket Böhranından sonra münasibətlərdə ən pis çöküş olduğunu və Moskvanın çəkindirmə vasitəsi kimi bütün raket arsenalını artırmalı olacağını bildirib.
Maşkov əlavə edib ki, potensial düşmənin Rusiyanın qüdrətini sınamasının qarşısını almaq üçün ölkənin müdafiə qabiliyyətinin gücləndirilməsi, o cümlədən raket arsenalının yaradılması üçün əlavə addımlar atılmalıdır. Stokholm Beynəlxalq Sülh Araşdırmaları İnstitutunun məlumatına görə, Rusiya 2024-cü ildə ümumi daxili məhsulunun (ÜDM) 7,1 faizini və ya ümumi dövlət xərclərinin üçdə birindən çoxunu hərbi xərclərə sərf edəcək.
Rusiyanın nüvə ritorikasının kəskinləşməsi Qərbin Ukraynadakı münaqişəyə müdaxilə etmək üçün həftələrdir daha açıq təhdidlərindən sonra baş verir. Fransa prezidenti Emmanuel Makron bu yaxınlarda The Economist-ə deyib ki, əgər işlər çətinləşərsə, Ukraynaya müdaxilə edəcəklər. "Mən heç nəyi istisna etmirəm, çünki biz heç nəyi istisna etməyən biri ilə qarşılaşırıq" dedi.
Eltac Zülfüqaroğlu/Turkustan.az
