Azərbaycan Olimpiya Oyunlarına ev sahibliyi edəcək? – AÇIQLAMA + FOTO

Avropa İdman Paytaxtları və Şəhərləri Federasiyası Bakı şəhərini 2026-cı il üçün dünyanın “İdman paytaxtı” seçib. Beynəlxalq təşkilatdan ölkəmizə göndərilmiş rəsmi məktubda Bakı şəhərinin namizədliyinin təsdiqləndiyi bildirilib. Azərbaycanda əhalinin sağlamlığının möhkəmləndirilməsi, yüksək standartlara uyğun mövcud idman infrastrukturu və idmanın təbliği üçün görülən nümunəvi fəaliyyət yüksək qiymətləndirilib. Gələn ilin sonunda Belçikanın Brüssel şəhərində, Avropa Parlamentində Bakı şəhərinin dünyanın “İdman paytaxtı” olaraq rəsmi təqdimat mərasiminin keçirilməsi planlaşdırılır.

Bu əlamətdar hadisə ilə bağlı fikirlərini Medianews.az-a bölüşən Əməkdar məşqçi Qələndər Aslanov bildirib ki, Azərbaycanda gənclər və idman sahəsinə ayrılan böyük diqqət, dövlət siyasətinin əsas istiqamətlərindən birini təşkil edir.

Onun sözlərinə görə, yeniyetmələrin, gənclərin fiziki-mənəvi tərbiyəsində, eləcə də mədəni həyatda iştirakında əhəmiyyətli rol oynayan bədən tərbiyəsi, həmçinin idman sahəsində ölkə rəhbərliyinin diqqət və qayğısı ilə hər il mühüm əhəmiyyətli tədbirlər keçirilir.

Əməkdar məşqçi qürur hissi ilə qeyd edib ki, Azərbaycan artıq beynəlxalq səviyyədə idman tədbirlərinin keçirildiyi bir ölkəyə çevrilib: “Bakı şəhərinin dünyanın idman paytaxtı seçilməsi, bizim üçün çox böyük uğurdur. Təsadüfi deyil ki, paytaxt şəhərimiz 2015-ci ildə ilk Avropa Oyunlarına, 2016-cı ildə Şahmat Olimpiadasına, 2017-ci ildə İslam Həmrəyliyi Oyunlarına, 2019-cu ildə UEFA Kubokunun finalına yüksək təşkilatçılıq səviyyəsində ev sahibliyi edib. Bu cür beynəlxalq əhəmiyyətli tədbirlərin Azərbaycanda, xüsusən Bakı şəhərində keçirilməsi idman sahəsində görülən işlərin, həyata keçirilən layihələrin nəticəsidir. Burada mütəmadi olaraq müxtəlif idman növləri üzrə Dünya, Avropa və beynəlxalq turnirlərin keçirilməsi, eləcə də Azərbaycan idmançılarının əsasən Olimpiya idman növlərində daim mükafatçılar sırasında yer almaları da ölkəmiz haqqında müsbət fikir yaradıb”.

Q.Aslanov vurğulayıb ki, 44 günlük Vətən müharibəsində, eləcə də ondan sonra ölkəmizin dünya hərb tarixində tanınmasında hərbçilərimizin fiziki hazırlığının da çox mühüm rolu olub: “Şuşanın işğaldan azad edilməsi bunun bariz nümunəsidir. Sözsüz ki, işğaldan azad olunmuş digər ərazilərimizdə də geniş idman infrastrukturları yaradılacaq, Qarabağımızda beynəlxalq idman yarışları təşkil olunacaq. Təbii ki, bu kimi görülən işlər, əhalinin kütləvi şəkildə bədən tərbiyəsi və idmana marağını da artıracaq. Əminliklə demək olar ki, Azərbaycan idmanı ölkə başçısı, Müzəffər Ali Baş Komandan, Milli Olimpiya Komitəsinin prezidenti İlham Əliyevin rəhbərliyi ilə daha da inkişaf edəcək, atletlərimiz yeni-yeni nailiyyətlər qazanacaqlar. Mən inanıram ki, 2026-cı ildə Bakının dünyanın “İdman paytaxtı” seçilməsi yaxın gələcəkdə Azərbaycanın Olimpiya Oyunlarına da ev sahibliyi edəcəyi anlamına gəlir”.

Ayşən RƏHİM