“Rusiya-Ukrayna savaşının III Dünya müharibəsinə gətirib çıxaracağının yetərli əlamətləri hələ görünmür...”

 

“Rusiyanın Ukrayna ərazisindəki hərbi əməliyyatları tamamilə qanunsuzdur. Bu, bəllidir və özünü Rusiyanın lideri sayan Putin öz ölkəsini ikinci bir Əfqanıstan bataqlığına salıb. Bununla da Əfqanıstan bataqlığı Sovet İttifaqının sonunu gətirdiyi kimi, Ukrayna bataqlığı da Rusiyadakı Putin rejiminin və bəlkə də bütövlükdə Rusiya imperiyasının sonunu gətirəcək”. 

Bu fikirləri Moderator.az-a açıqlamasında beynəlxalq məsələlər üzrə analitik Teymur Qasımlı “Rusiyanın Ukraynanın işğalını inadla davam etdirməsi 3-cü Dünya savaşının baş vermə ehtimalını artırırmı?” sualını cavablandırarkən ifadə edib.

 

“Düşünürəm ki, Putinin Ukraynaya  təcavüzünün davam edəcəyi təqdirdə İkinci Dünya müharibəsi kimi bir total savaş başlamasa da, bütün hallarda planetdə, bəşəriyyətdə bir cəbhələşmə başlayıb. Belə ki, bir yanda Qərb dövlətləri başda olmaqla Ukrayna tərəfdarları, digər cəbhədə isə Rusiya və ona açıq-gizli yardım edən bir neçə ölkə. Düzdü, təhlillər aparanda qlobal savaş təhlükəsi görünür. Ancaq hesab edirəm ki, hələlik bu, Rusiya-Ukrayna savaşı kimi, bir-birini tükəndirmə döyüşləri ilə  davam edəcək... Və görünən odur ki, heç bir tərəf bu müharibənin daha da böyüməsini, geniş miqyas almasını istəmir. Həmçinin müxtəlif üsullarla savaşın dayandırılması təkliflərini irəli sürürlər. Xülasə, Rusiya-Ukrayna savaşının III Dünya müharibəsinə gətirib çıxaracağının yetərli əlamətləri hələ ki görünmür”,- deyə davamında siyasi şərhçi vurğulayıb.

 

S.Laçın