Ankarada tarixi zirvə görüşündən əvvəl Mitsotakisin gətirdiyi nümunə: Səlcuq simvolu

Ankara səfərindən əvvəl Yunanıstan mətbuatına açıqlama verən Mitsotakis isti münasibətlərin davam edəcəyini bildirərkən maraqlı bir misal çəkib.

Publika.az xəbər verir ki, Yunanıstanın baş naziri Kriyakos Mitsotakis Ankarada prezident Rəcəb Tayyib Ərdoğanla rəsmi təmaslarından əvvəl “protothema.gr” xəbər portalına müsahibə verib. Türkiyə ilə əlaqələri dəyərləndirən Mitsotakis Kariye Muzeyinin məscid olaraq ibadət üçün açılmasını yanlış hesab etdiyini, lakin Türkiyə ilə Yunanıstan arasında ikitərəfli münasibətlərdə müsbət atmosferin davam etdiyini qeyd edib.

Mitsotakis Türkiyə ilə Yunanıstan münasibətlərinin gedişatını dəyərləndirərkən maraqlı bənzətmə edib. Anadoluda türklərin ilk imperiyası olan Səlcuqlulara toxunub.“Səlcuqların ikibaşlı qartalı kimi biz də həm Şərq, həm də Qərblə əlaqələrimizi ortaq maraqlarımız əsasında inkişaf etdirməyə çalışacağıq”,- Yunanıstanın baş naziri deyib.

Anadolu simvolu

Mitsotakisin istinad etdiyi “İkibaşlı Qartal” Şumerlərdən Xetlərə, onlardan da Səlcuqlulara qədər Anadolu və ətrafındakı sivilizasiyaların güc simvolu olaraq diqqət çəkir. Şumerlərdə Laqaş şəhərinin simvolu olan ikibaşlı qartal əvvəlcə akkadlara keçsə də, zamanla Assurlara, Sasanilərə, Bizanslılara və Türklərə də keçib.

Simvolun müxtəlif hekayələri

Səlcuq simvolunun Orta Asiyada şamanizm inancına qədər uzanan başqa bir hekayəsi var. Şaman inancına görə, yerlə göy arasındakı qapıları ikibaşlı qartal tutur. Məlumdur ki, türklər qılınc saplarında ikibaşlı qartal fiqurundan istifadə edirdilər. Tarixçilərin fikrincə, Anadoluda Artuqi bəyliyinin sikkələrində və Səlcuqlu strukturlarında istifadə edilən ikibaşlı qartal hökmranlıq simvolu kimi istifadə edilmişdir. Görünür, Orta Asiyada bütün türk sivilizasiyaları ikibaşlı qartaldan güc simvolu kimi istifadə ediblər.

Simvol həm də kilsədə var idi

Tarixi mənbələrə görə, simvol Bizansda dövləti və ölkəni idarə edən kilsəni vahid struktur kimi təmsil edirdi. Bizansdan Avropaya keçən ikibaşlı qartal Roma-German İmperiyasının heraldikasında və Almaniya, Avstriya-Macarıstan və Rusiyanın dövlət gerblərində də görünür. Bu baxımdan Yunanıstan Baş naziri Mitsotakisin səfərdən əvvəl Şərq və Qərbin paylaşdığı bir simvola istinad etməsi əhəmiyyət qazanır.

Daha iki görüş olacaq

Belə ki, Miçotakis həmçinin Türkiyə və Yunanıstanın əsas fikirlərindən əl çəkmədiklərini ifadə edərək, “müsbət atmosfer” olduğuna diqqət çəkib. Miçotakisin Ankara səfəri üçün hazırlıqlar da tamamlanıb. Görüşün müsbət atmosferdə keçəcəyi gözlənilir. Yunan mediası Türkiyə baxımından iki ölkə arasında etimad və əməkdaşlıq mühitinin qurulduğunu və bunun daha çox ticari əlaqələrdə əks olunması fikrinin əhəmiyyət qazandığını vurğulayır. Miçotakis və Ərdoğanın yayda NATO toplantısında, sentyabrda isə BMT-də yenidən danışıqlar aparacağı gözlənilir. Yunan mətbuatında əks olunan bir başqa məlumata görə, təmaslarda iki ölkə arasında dəniz yurisdiksiyası məsələsinin həlli üçün müsbət atmosfer gündəmdə olacaq.