Qatıq təkcə dadlı və qidalı məhsul deyil, həm də sağlamlıq üçün əhəmiyyətli faydalara malikdir. Xüsusilə probiotiklərlə zəngin olması onun bağırsaq mikrobiomunu gücləndirməsinə və immun sistemini dəstəkləməsinə kömək edir.
E-saglam.az-ın məlumatına görə, son araşdırmalar göstərir ki, qatıq istehlakı kolon xərçəngi riskini azalda bilər.
Elmi araşdırmalar nəyi sübut edir?
ABŞ-ın Mass General Brigham və Qadın Xəstəxanasının alimləri 30 il ərzində 150 000-dən çox insanın sağlamlıq məlumatlarını araşdırıblar. Bu tədqiqat zamanı həftədə ən azı iki dəfə qatıq yeyən insanların bəzi aqressiv kolorektal xərçəng növlərinə tutulma ehtimalının daha az olduğu müəyyən edilib.
Mütəxəssislər bu nəticəni qatığın bağırsaqlarda sağlam bakteriya tarazlığını qorumaq qabiliyyəti ilə izah edirlər. Bağırsaq mikrobiomunun sağlam olması orqanizmin immun sistemini gücləndirir və müxtəlif xəstəliklərə, o cümlədən xərçəngə qarşı müdafiəni artırır.
Qatıq xərçəng riskini necə azaldır?
Bağırsaq sağlamlığını qoruyur – Probiotiklər bağırsaqlarda faydalı bakteriyaların artmasını təmin edir, zərərli bakteriyaların çoxalmasının qarşısını alır.
İmmun sistemini gücləndirir – Sağlam bağırsaq mikrobiomu bədənin immun funksiyalarını artırır və iltihablanmanı azaldır.
Xərçəngə səbəb ola bilən maddələri neytrallaşdırır – Qatıq tərkibindəki bəzi faydalı bakteriyalar zərərli toksinləri parçalayaraq bağırsaqların selikli qişasını qoruyur.
DNT zədələnməsinin qarşısını alır – Antioksidant təsir göstərən bəzi probiotiklər hüceyrələrin mutasiyaya uğramasının qarşısını ala bilər.
Mütəxəssislər nə tövsiyə edir?
Tədqiqatın rəhbərlərindən biri olan Dr. Tomotaka Ugai bildirib ki, qatıq bağırsaq sağlamlığına müsbət təsir etdiyi üçün onu istehlak etmək tövsiyə olunur. O, “Əgər siz qatıq sevirsinizsə, onu yeməyə davam edin” deyərək qatığın gündəlik qidalanma rejiminə daxil edilməsinin vacibliyini vurğulayıb.
Həftədə ən azı iki dəfə qatıq istehlak etmək kolon xərçəngi riskini azaltmağa kömək edə bilər. Sağlam qidalanma vərdişləri və probiotiklərlə zəngin qidalar, xüsusilə də qatıq, uzunmüddətli sağlamlıq üçün əhəmiyyətli rol oynayır. Əgər bağırsaq sağlamlığınızı qorumaq və potensial xərçəng riskini azaltmaq istəyirsinizsə, qatığı gündəlik qida rasionunuza daxil etməyə dəyər.
Tərcümə: Könül Oruc
