Makronun ABŞ səfəri və Ukrayna ilə bağlı Trampla görüşü mənasız vaxt itkisi idi. O, ABŞ-dən Ukraynada mümkün Avropa qoşunlarının təhlükəsizliyinə zəmanət və ya Avropanın danışıqlar prosesinə cəlb olunması ilə bağlı vədlər ala bilmədi.
“AzPolitika” xəbər verir ki, bunu “Politico” nəşri Avropadakı diplomatik mənbələrə istinadla yazıb.
Aİ rəsmiləri və diplomatlarının sözlərinə görə, Fransa Prezidenti “ABŞ-nin təhlükəsizlik zəmanətləri ilə bağlı Trampdan dəqiq təminat ala bilməyib”: “Makron Trampın zəmanətlərlə bağlı konkret vədlər vermədiyini bildirir. Buna görə də bu məsələdə strateji qeyri-müəyyənlik qalmaqdadır”.
Avropalılar hələ də ümid edirlər ki, ABŞ Ukraynada yerləşdiriləcək potensial Avropa sülhməramlı qüvvələri üçün kəşfiyyat məlumatlarının toplanmasını, hava hücumundan müdafiəni və hərbi nəqliyyatı dəstəkləyə bilər. Amma görüşdə iştirak edən yüksək rütbəli Aİ rəsmisi bu cür zəmanətlərin alınmadığını və səfərin "mənasız vaxt itkisi olduğunu” qeyd edib.
Trampla görüşdə Ukrayna üzrə sülh danışıqlarında iştirak etmək üçün Aİ-nin xüsusi nümayəndəsinin təyin edilməsi də müzakirə olunub: “Lakin Tramp Rusiya ilə apardığı danışıqlarda avropalıların iştirakında maraqlı deyil”.
