Mikro və kiçik sahibkarlıq subyektlərinin məhsullarının satışına dəstək olmaq, eləcə də istehlakçıları birbaşa kənd təsərrüfatı və qida məhsullarının istehsalçıları ilə əlaqələndirmək məqsədilə martın 5-dən etibarən “KOB bazar” satış yarmarkasına start verilir.
Kiçik və Orta Biznesin İnkişafı Agentliyinin (KOBİA) məlumatına görə, yarmarka Binəqədi rayonunda, Koroğlu və Əcəmi Naxçıvani küçələrinin kəsişməsində yerləşir. Bazar Novruz və Ramazan bayramları günlərində hər gün, digər günlərdə isə həftəsonu fəaliyyət göstərəcək. Yarmarkada Abşeron və ölkənin digər bölgələrində istehsal olunan kənd təsərrüfatı və qida məhsullarının satışı həyata keçiriləcək.
“KOB bazar”ın üstünlükləri:
- Təzə və keyfiyyətli kənd təsərrüfatı və qida məhsulları;
- Məhsulları birbaşa istehsalçıdan almaq;
- Ucuz və sərfəli qiymət;
- KOB-ların məhsullarının satışına dəstək.
Bakı sakinləri və şəhərimizin qonaqları alış-veriş üçün martın 5-dən fəaliyyət göstərəcək “KOB bazar”a dəvət edilir.
Qeyd edək ki, “KOB bazar” satış yarmarkası KOBİA-nın təşkilatçılığı ilə, dövlət dəstəyi hesabına fəaliyyət göstərəcək.
