ABŞ-ın Ukrayna müharibəsini bitirmək üçün atdığı addımlarla Rusiya ilə yaxınlaşması NATO-da dərin sarsıntı yaratdı.
Hafta.az-ın “Wall Street Journal”a istinadən yazdığına görə, ABŞ prezidenti Donald Trampın Rusiya ilə yaxınlaşmaq üçün atdığı addımlar “Qərbin onilliklər boyu davam edən siyasətinə ziddir”.
NATO təxminən 76 il əvvəl ABŞ və müttəfiqləri tərəfindən Sovet Rusiyasına qarşı yaradılıb. Alyans ABŞ-ın hücuma məruz qalan istənilən müttəfiqini müdafiə etmək üçün öz hərbi qüdrətindən, o cümlədən nüvə arsenalından istifadə edəcəyi ideyasına əsaslanır. Lakin təhlil göstərir ki, bu əsas prinsip indi şübhə altına alınmağa başlayıb.
NATO-nun Avropadakı Müttəfiq Qüvvələrinin keçmiş komandanı Ceyms Stavridis qeyd edir ki, alyans çox çətin bir dövrdən keçir: “Mən narahatam ki, biz NATO-nun son günlərini yaşayırıq”.
Təhlildə yazılır ki, NATO-ya üzv Avropa ölkələrinin nə özlərini, nə də Ukraynanı uzunmüddətli perspektivdə müdafiə edə biləcək mürəkkəb hərbi sistemləri yoxdur. Bildirilir ki, NATO daxilində əmək bölgüsündə bu rol uzun müddətdir ki, ABŞ-ın üzərinə düşür.
2016-2019-cu illərdə NATO Baş katibinin ilk qadın müavini vəzifəsində çalışmış ABŞ diplomatı Rouz Qottemoller deyir: “Avropalılar narahat olmalı, öz hərbi sənayelərini və imkanlarını inkişaf etdirməlidirlər”.
Avropa İttifaqının Təhlükəsizlik Araşdırmaları İnstitutundan Cüzeppe Spatafora da bildirir ki, ABŞ-ın müttəfiqlərindən dəstəyi geri çəkəcəyi təqdirdə hazır olmaq lazımdır.
“Reuters”in bugünkü xəbərlərində Vaşinqtonun Moskvaya qarşı sanksiyaları yumşaltmağı planlaşdırdığı bildirilir. Bundan əlavə, fevralın 24-də BMT Baş Assambleyasında (BMGK) keçirilən səsvermədə ABŞ və Rusiya Ukraynada müharibənin dayandırılmasını tələb edən qanun layihəsinin əleyhinə səs veriblər. Co Bayden administrasiyası dövründə Vaşinqton BMT Təhlükəsizlik Şurasının iclaslarında Ukrayna müharibəsi ilə bağlı layihələrində Rusiyaya qarşı çıxırdı.
Tramp və Ukrayna prezidenti Vladimir Zelenski fevralın 28-də Ağ Evdə görüşüblər və görüşdə iki lider arasında qızğın müzakirələr aparılıb. Bu səbəbdən Vaşinqtonla Kiyev arasında nadir torpaq elementləri üzrə mədən sazişi imzalana bilmədi. Çətin görüşdən sonra ABŞ dünəndən etibarən Ukraynaya bütün hərbi dəstəyin dayandırıldığını açıqlayıb.
Digər tərəfdən, Rusiya prezidenti Vladimir Putin nadir torpaq elementləri sahəsində ABŞ-la birgə işləməyə hazır olduqlarını bildirib.
