Finss.az - Çin alimləri arteriyalarda lövhə əmələ gəlməsinin qarşısını alan, insult, infarkt və digər ciddi xəstəliklər riskini azaldan innovativ nano-vaksin hazırlayıblar. South China Morning Post-a istinadən verilən xəbərə görə, bu, Nankin Universiteti və Çin Elm və Texnologiya Universiteti mütəxəssislərinin apardığı araşdırmanın nəticəsidir.
Vaksin iki komponentli bir əsasda işləyir: birinci komponent, əsas antigeni daşıyan dəmir oksidi nanohissəcikləridir ki, bu da bədənin immun reaksiyasını stimullaşdırır. İkinci komponent isə peyvəndin təsirini gücləndirir. Bu yanaşma, bədənin müdafiə mexanizmlərini aktivləşdirərək, damarlarda xolesterol yığılmasının qarşısını alır.
Xolesterol yataqları damarlarda daralmaya və tıxanmalara səbəb olur, bu da miyokard infarktı və insult kimi ciddi xəstəliklərin riskini artırır. Alimlər qeyd edirlər ki, ilkin laboratoriya tədqiqatları vaksinin aterosklerozla mübarizədə effektivliyini göstərib. Siçanlar üzərində aparılan sınaqlar müsbət nəticələr verib.
Növbəti mərhələdə vaksinin daha böyük heyvanlar üzərində sınaqdan keçirilməsi planlaşdırılır və daha sonra klinik testlərə başlanacaq. Tədqiqatçılar ümid edir ki, bu nano-vaksin ürək-damar xəstəliklərinin qarşısını almaqda mühüm irəliləyişlərə gətirib çıxaracaq.
Zemfira Ms
Finss.az
