19 yaşadək futbolçulardan ibarət Azərbaycan millisinin (U-19) baş məşqçisi Elxan Abdullayev AFFA-nın rəsmi saytına açıqlama verib.
Arena.az xəbər verir ki, U-19-un baş məşqçisi Qəbələdə təşkil olunmuş təlim-məşq toplanışı çərçivəsində Moldova yığması ilə keçirdiləri yoxlama oyunlarını (0:0, 1:4) şərh edib:
“Moldova yığmasına qarşı iki fərqli oyun izlədik. İlk görüşdə heç-heçə etdik. İkinci qarşılaşmada isə bütün futbolçulara şans verməyə çalışdım. Heyəti tamamilə dəyişmişdik. Toplanış seleksiya xarakteri daşıyırdı. Növbəti toplanışlarda kimlərlə yolumuza davam etməli olduğumuzu dəqiqləşdirmək üçün hamıya şans verdik. Təbii ki, məğlubiyyətdə bu amil öz təsirini göstərdi. İyunda yenidən bir araya gələcəyik. Futbolçuları izləmək və seçim etmək üçün vaxtımız olacaq. Yaydakı toplanışda qarşıdakı seçmə mərhələ matçlarına hazırlaşacağıq”, deyə Elxan Abdullayev vurğulayıb.
