ABŞ dövlət katibi Marko Rubionun xarici nümayəndəliklərə ABŞ vizası üçün müraciət edənlərin Fələstinə dəstək olub-olmadığını müəyyən etmək üçün sosial media hesablarını nəzərdən keçirməyi tapşırdığı bildirilir.
Yeniavaz.com xəbər verir ki, bu barədə “The New York Times” qəzeti dövlət rəsmilərinə istinadla məlumat yayıb.
Adının açıqlanmasını istəməyən rəsmilərin sözlərinə görə, Rubio ABŞ-nin xaricdəki nümayəndəliklərinin əməkdaşlarına ABŞ və İsraili tənqid edən şəxslərin tələbə və digər vizalar üçün müraciət edərkən ölkəyə girişinin qarşısını almaq üçün sosial media məzmununu yoxlamağı tapşırıb.
Sərəncam xüsusilə İsrailin 7 oktyabr 2023-cü ildə Qəzzaya hücumlarının başlamasından sonrakı dövrdə tələbə və digər vizaları hədəf alır və sosial media yoxlamalarının əsas məqsədlərindən biri həmin şəxslərin Fələstin tərəfdarı olub-olmadıqlarını müəyyən etməkdir.
Qəzetin yazdığına görə, bu cür bəyanatlar əcnəbi vətəndaşları ABŞ vizası almaq şanslarını təhlükəyə atmamaq üçün öz fikirlərini və bəyanatlarını özünüsenzura etməyə məcbur edə bilər.
