1 iyul 2024-cü ildən etibarən Oxu.az mobil tətbiqinin köhnə versiyasına dəstək dayandırılacaq - yenilənmiş versiyanı endirmək üçün Google Play və ya AppStore-a keçməyiniz xahiş olunur.
Bakının mərkəzində həftəsonu parklanmaya məhdudiyyət tətbiq olunan küçələrdə kənar avtomobillərin park olunması sakinlərin narazılığına səbəb olub.
Bununla bağlı Oxu.Az-a şikayət daxil olub.
Qeyd olunub ki, əraziyə giriş üçün nəzərdə tutulan şlaqbaumun qarşısında park edilən kənar nəqliyyat vasitələri sakinlərin şəxsi avtomobilləri ilə giriş-çıxışına mane olurlar.
"Nəqliyyatı Əlaqələndirmə Şurasının qərarı ilə 17 mart 2024-cü il tarixindən etibarən həftəsonları Səbail rayonu ərazisində yerləşən Zərifə Əliyeva (Rəsul Rza küçəsi ilə kəsişmədən sonra), Əbdülkərim Əlizadə, Tərlan Əliyarbəyov və Yusif Məmmədəliyev küçələrində nəqliyyat vasitələrinin hərəkəti məhdudlaşdırılır.
Həftəsonu məhdudiyyətin tətbiq olunduğu günlər ərzində, "AzParkinq" mobil tətbiqində fərdi parklanma talonu olan sakinlərin şəxsi nəqliyyat vasitələri ilə rahat şəkildə əraziyə girişi Neftçilər prospekti istiqamətində Tərlan Əliyarbəyovdan, çıxışı isə Yusif Məmmədəliyev küçələrindən nömrə tanıma şlaqbaum sistemi vasitəsilə təşkil edilib.
Amma həftəsonu məhdudiyyətin tətbiq olunduğu gün ərzində həmin ərazidə yerləşən restoran və kafelərə fərdi parklanma talonu olmayan nəqliyyat vasitələri qanunsuz olaraq rahat şəkildə öz avtomobillərini park edirlər və ərazidə xidmət aparan AYNA əməkdaşları bu qanunsuzluğa zəmin yaradırlar", - deyə şikayətdə bildirilir.
Məsələ ilə bağlı Azərbaycan Yerüstü Nəqliyyat Agentliyinin (AYNA) mətbuat katibi Tural Orucov Oxu.Az-a açıqlamasında qeyd edib ki, həftəsonu və bayramlarla əlaqədar elan edilən istirahət günlərində nəqliyyat vasitələrinin hərəkətinin məhdudlaşdırıldığı ərazilərə yalnız ərazidəki binalarda qeydiyyatı olan və fərdi parklanma talonuna malik şəxslərin avtomobillərinə giriş üçün icazə verilir.
"Nömrətanıma sistemi vasitəsilə əraziyə giriş-çıxış edən bütün nəqliyyat vasitələrinə nəzarət olunur. Eyni zamanda əraziyə operativ nəqliyyat vasitələri və kommunal xidmətlərə məxsus xüsusi texnikanın girişi təmin edilir.
Ərazidə xidmət aparan AYNA əməkdaşlarının hər hansı bir qanunsuz fəaliyyəti ilə bağlı bu günədək müraciət daxil olmayıb. Sui-istifadə halları ilə bağlı konkret fakt varsa, araşdırmaq və tədbir görmək üçün AYNA-ya vətəndaşın avtomobilinin dövlət qeydiyyat nömrəsini təqdim etmək xahiş olunur", - deyə T.Orucov vurğulayıb.
O bildirib ki, hər hansı bir vətəndaş həmin ərazidə yerləşən binalardan birinə qeydiyyata düşməklə və ya sakinin verdiyi etibarnamə vasitəsilə də fərdi parklanma talonu əldə edə bilər.
"Bu zaman avtomobili idarə edən şəxsin ərazidə yaşayan sakin olub-olmadığını ayırd etmək çətinlik yaradır. Zərifə Əliyeva və Rəsul Rza küçələrinin kəsişməsində sədd kimi düzülən dibçəklərin kənara çəkilməsinə gəlincə, bu kimi hallara rast gəlinir. Qarşısını almaq üçün isə aidiyyəti qurumla birgə tədbirlər görülür.
Onu da bildirək ki, "Yol hərəkəti haqqında" Qanuna əsasən, giriş-çıxışlarda və şlaqbaumların qarşısında avtomobillərin saxlanması qadağandır. Bu cür hallar baş verdikdə, əraziyə aidiyyəti qurumun əməkdaşları dəvət edilərək qanunauyğun tədbirlər görülür", - deyə T.Orucov əlavə edib.
Əzizə İsmayılova
