Premyer Liqanın XXVIII turunda “Sumqayıt”ın qonağı olan “Sabah” səfərdə 3:3 hesablı heç-heçəyə imza atıb.
Sportinfo.az xəbər verir ki, bu, Bakı klubunun mövsümdə 15-ci bərabərliyi olub.
Paytaxt təmsilçisi bununla da Azərbaycan çempionatları tarixinin mütləq rekorduna imza atıb. “Sabah” bir mövsümdə ən çox heç-heçə edən komanda adına sahib çıxıb.
Bunadək rekord hərəyə 14 sülhə imza atan “Neftçi” (2009/10), “Bakı” (2012/13) və “Zirə”yə (2020/21) məxsus idi. Ötən tur bu komandalara çatan “Sabah” Sumqayıtdakı heç-heçə ilə tarixə düşüb.
Heç-heçələrin oyunlara nisbətən faiz göstəricisi baxımından 28 oyunda 15 heç-heçə edən “Sabah” dünyanın bütün ölkələrinin bütün liqaları üzrə 53,6 faiz göstərici ilə yalnız 44-cü yerdədir.
Bu statistikada yeni başlayan çempionatda ilk 1 və ya 2 oyununu sülhlə başa vuraraq 100 faizli göstəriciyə malik olan klublar nəzərə alınmayıb.
Planetin “sülhsevərlər” siyahısına Uruqvay Primerasında ilk 8 oyunundan 7-sində xalları bölən “Danubio” 87,5 faiz göstərici ilə başçılıq edir.
Argentinanın Primera B Nasional divizionunun 3 klubu – “Alvarado”, “Arsenal Sarandi” və “Defensores de Belqrano” 7 oyuna 5 heç-heçə edərək, 71,4 faiz göstərici ilə lideri izləyirlər.
