Dünyanın sonundan qorxub ofisianta külli miqdarda bəxşiş verdi

ABŞ-da bir restoranın müştərisi ofisiant üçün böyük bir bəxşiş qoyub. Bu barədə onun dostu Reddit platformasında məlumat yayıb.

Lent.az xarici KİV-ə istinadla bildirir ki, istifadəçilərdən biri aprelin 8-də baş vermiş son Günəş tutulması ilə bağlı qeyri-adi hekayəni paylaşıb. Məlumata əsasən, müştəri müntəzəm olaraq bu restorana gəlib. Təbiət hadisəsindən bir gün əvvəl o, ofisiant qıza 300 dollar bəxşiş qoyub. Ancaq hesab cəmi 40 dollar olub. Eyni zamanda qadın ofisiantdan onun xristian olub-olmadığını və Allaha inanıb inanmadığını soruşub.

Bir neçə gündən sonra qadın geri qayıdıb. Bu dəfə ona başqa ofisiant xidmət göstərib. Ofisiantın dediyinə görə, o, dayanmadan onun xristian olub-olmadığını soruşub. İşçi ona "yox" cavabı verib və sonra qadın Günəş tutulmasından sonra dünyada qalan günahkarlar üçün hər şeyin nə qədər dəhşətli olacağını söyləməyə başlayıb. Ofisiant dialoqa girməyib və digər müştərilər kimi qadına xidmət etməyə davam edib. Şam yeməyini bitirdikdən sonra qadın ofisianta tezliklə ehtiyac duyacağını deyərək 777 dollar pul qoyub.

Çaşmış ofisiant sonradan problem olmasın deyə, baş verənləri müdirlə müzakirə etmək qərarına gəlib. Menecer pulun məbləğinə əmin olub-olmadığını soruşanda, müştəri, "Əlbəttə, bunlar Allahın rəqəmləridir", deyərək gedib.