Türkiyəli aktrisa Aybüke Pusat TRT-də yayımlanan “Teşkilat” serialının heyətindən çıxarılıb.
“Qafqazinfo” xəbər verir ki, bununla bağlı Türkiyə KİV-ləri məlumat yayıb.
Bildirilib ki, aktrisanın serialdan uzaqlaşdırılmasına səbəb onun boykot çağırışları ilə bağlı paylaşım etməsidir.
TRT də məsələ ilə bağlı açıqlama yayıb.
Açıqlamada deyilir: “Türkiyənin milli ictimai televiziyası TRT keyfiyyətli yayımı və məzmunu ilə ölkəmizdə və dünya miqyasında böyük hörmətə malik bir türk markasıdır. TRT-nin nüfuzunu və marka gücünü qorumaq TRT rəhbərliyinin ən mühüm vəzifələrindən biridir. TRT ilə işləyən şirkətlər və şəxslər də ictimai yayımın prinsiplərini bilir və TRT layihəsində iştirak edərkən bu prinsiplərə uyğun hərəkət etmək məsuliyyətini öz üzərlərinə götürürlər.
Millətimizi təmsil edən TRT-nin layihələrində iştirak edənlərin bir siyasi partiyanın açıq-aşkar başlatdığı (buna görə də siyasi mahiyyəti ilə ön plana çıxması), ölkəmizin iqtisadiyyatını hədəfə alan, siyasəti və cəmiyyəti qəlibə salmağı hədəfləyən, milləti qütbləşdirən bir siyasi kampaniyanın tərkibində yer alması yolverilməzdir. Bir siyasi qrupun öz siyasi məqsədləri üçün irəli sürdüyü boykot çağırışında vəsilə olmaq TRT-nin prinsiplərinə, ictimai yayım anlayışına və peşəkarlığına açıq şəkildə ziddir. Bu kontekstdə TRT 1-də yayımlanan “Teşkilat” serialında rol alan aktrisanın paylaşımları TRT-nin institusional prinsipləri ilə tamamilə uyğun gəlmir. Sözügedən şəxs “Teşkilat” serialının izləyicilərini məyus edən paylaşımlara görə serialdan uzaqlaşdırılıb”.
Qeyd edək ki, Aybüke “Teşkilat” serialında “Neslihan” obrazını canlandırırdı.
