Bu gün gürcü xalqının müqəddəs milli bayramlarından biri olan “Qorqodoba” bayramıdır. Bu bayramı ölkəmizdə yaşayan milli azlıqlardan olan gürcü xalqı da qeyd edir.
“Yazın gəlişi, oyanış” mənasını daşıyan bu bayram haqqında Bizim.Media-ya danışan gürcü əsilli xanım Nino Tamazaşvili bildirdi ki, onlar Azərbaycanda yaşamaqlarına baxmayaraq öz milli bayramlarını daima qeyd edir, adət-ənənələrini yaşadırlar.
“Bu bayramı adətən yaz ayında ildə bir dəfə qeyd edirik. Bayramda ilk öncə ölülər yad edilib, onların adına duz salınıb, şamlar yandırılır.
Bu gün bütün evlərdə süfrələr açılır. Bu ay orucluq olduğu üçün süfrəyə ət, süd, yumurta, yəni heyvan məşəli qidalar qoyulmur. Bayramda xüsusilə buğdadan hazırlanan “qorqod” adında yeməyin hazırlanması vacib amillərdəndir. Həmin yeməyin tərkibinə buğda, qoz, bəzən kişmiş də qatılır.
Günorta saatlarında süfrə açılıb yeməklər yeyildikdən sonra hamı bir-birinə qonaq gedir, bayramlaşır. “Qorqodoba”-nın ən əsas adəti yelləncək salıb yellənmək, bir neçə oyunlar oynamaqdır”.
Qeyd edək ki, Azərbaycanda yaşayan azsaylı xalqların öz adət-ənənələrini rahat şəkildə yaşatmaları ölkəmizin tolerant ölkə olmasını bir daha sübut edir.
Leyla Vəfadar, Bizim.Media, Mərkəzi Aran bürosu
