Osaka Universiteti və Diponegoro Universitetinin tədqiqatçıları tarakanların təbii hərəkət qabiliyyətindən istifadə edərək onları elektron sistemlərlə təchiz ediblər.
Editor.az xəbər verir ki, bu sistem həşəratların bədənlərinə yerləşdirilən elektrodlar vasitəsilə hərəkətlərini istiqamətləndirməyə imkan verir.
“Kiçik miqyaslı robot istehsalı çox çətin bir prosesdir. Bu maneəni aradan qaldırmaq üçün biz təbii orqanizmə elektron cihazları əlavə etməyi seçdik”, – mühəndis-mexanik Mochammad Ariyanto bildirib.
Madaqaskar fısıltılı tarakanlar üzərində aparılan təcrübələrdə alimlər bu kiberböcəklərin qum, daş və taxta maneələrlə dolu ərazilərdə uğurla naviqasiya etdiklərini müşahidə ediblər.
İnkişaf etdirilən “biohibrid davranışa əsaslanan naviqasiya (BIOBBN) sistemi” sayəsində böcəklər müəyyən edilmiş hədəfə çatarkən maneələri dəf edə bilirlər.
Tədqiqatçılar bildirirlər ki, bu sistem iki fərqli naviqasiya alqoritmini ehtiva edir. Sadə mühitlərdə istifadə edilən sistem daha böyük elektron kürək çantası tələb etdiyi halda, mürəkkəb ərazidə istifadə edilən sistem daha yüngül aparatlarla işləyir.
Kiberböcəklər zəlzələ və müharibələr kimi fəlakətlər zamanı dağıntılar altında qalan insanları aşkar etmək üçün istifadə edilə bilər.
Dar tunelləri, boru kəmərlərini və insanların çətin çıxışı olan əraziləri araşdırmaq potensialına malik olan bu texnologiya ətraf mühitin monitorinqi və mədəni irs obyektlərinin qorunması üçün də istifadə edilə bilər.
“Bu biohibrid naviqasiya sistemi bizə mexaniki robotların düşdüyü kimi fundamental problemlərin öhdəsindən gəlməyə kömək edə bilər”, – Osaka Universitetindən Keisuke Morishima bildirib.
Onun sözlərinə görə, bu, real dünya şəraitində istifadə üçün uyğun bir həlldir. Bununla belə, tədqiqat qrupu qeyd edir ki, həşəratların bu vəziyyətə necə reaksiya verməsi üzərində daha çox iş görülməlidir.
//Samir Qurbanov, Editor.az
