Məlum olduğu kimi, Naxçıvan Muxtar Respublikası Ali Məclisinin yaz sessiyasının iclasında “Naxçıvan Muxtar Respublikasının Konstitusiyasında dəyişikliklər edilməsi haqqında” qanun layihəsi müzakirə edilib. Layihəyə əsasən, Naxçıvanda səlahiyyətli nümayəndəlik institutunun yaradılması da həyata keçiriləcək. Azərbaycanın Konstitusiyasında nümayəndəlik institutu məsələsi öz əksini tapmadığı üçün Naxçıvanda ediləcək dəyişikliyin ana qanunla ziddiyyət təşkil etdiyi bildirilir.
Bununla bağlı Pravda.az-a açıqlama verən Milli Məclisin İnsan hüquqları komitəsinin sədr müavini Arzuxan Əlizadə də deyib ki, Naxçıvan Konstitusiyası Azərbaycan Konstitusiyasına uyğun olmalıdır: ““Naxçıvan Muxtar Respublikasının Konstitusiyasında dəyişikliklər edilməsi haqqında” qanun layihəsi müzakirə edilib, artıq bununla bağlı qərar da var. Amma hansı dəyişikliklər ediləcək? Layihə bizdə olmadığı üçün konkret münasibət bildirmək olduqca çətindir. İstənilən halda, Naxçıvan Azərbaycanın tərkib hissəsidir. Buna görə də Naxçıvan Konstitusiyası mütləq mənada Azərbaycan Respublikasının Konstitusiyasına uyğun olmalı, uyğunlaşdırılmalıdır. Burada ziddiyyət ola bilməz. Yəqin ki, layihəni hazırlayanlar bu vacib amili diqqətdən qaçırmazlar. Naxçıvan Konstitusiyasında hansısa dəyişikliklər olacaqsa, təbii ki, ardınca Azərbaycan Respublikasının Konstitusiyasında da mütləq həmin məsələlərlə bağlı dəyişikliklərə gedilməlidir. Əlbəttə, bunun üçün referendum keçirilməsi lazımdır. Hələ ki, yaxın dövr ərzində referendum olacağına isə inanmıram”.
Aytəkin Qardaşova
